Azərbaycan Respublikası Mədəniyyət Nazirliyi və Beynəlxalq Muğam mərkəzinin təşkilatçılığı ilə “Sazın səsi, sözün nəfəsi” adlı aşıqlardan ibarət konsert proqramı təşkil olunub.

Turaztv.az AZƏRTAC-a istinadən xəbər verir ki, tədbirdə çıxış edən Beynəlxalq Muğam Mərkəzinin direktoru, Əməkdar artist, Özbəkistan Mədəniyyət elçisi Sahib Paşazadə konsertin “Sazın səsi, sözün nəfəsi” layihəsi çərçivəsində ilk tədbir olduğunu deyib.

O bildirib ki, layihə il boyunca ayda bir dəfə təşkil edilməklə davam edəcək. Layihənin məqsədi Azərbaycan aşıq mədəniyyətinin əsas sütunlarını - klassik aşıq sənətini, poetik forma, musiqi ifaçılığı və ustad-şəyird ənənəsini tamaşaçıya səhnə formatında təqdim etməkdir.

Layihə həm maarifləndirici, həm də bədii-estetik xarakteri daşıyır.

"Əsas məqsədimiz Azərbaycan klassik aşıq sənətinin tarixi dəyərini geniş auditoriyaya çatdırmaqdır. Ustad aşıqların yaradıcılığını təbliğ etmək, gənc aşıqların çıxışına meydan yaratmaq, folklor irsinin müasir səhnədə yeni tərzdə təqdim etməkdir", - deyə S.Paşazadə deyib.

Professor Asif Rüstəmli bildirib ki, bu cür layihələrin həyata keçirilməsi olduqca vacib məsələlərdəndir. Aşıq Ədalət təkcə saz çalmırdı, o, həm də sazı bir mədəniyyət hadisəsi kimi təqdim edir, onu dinləyiciyə sevdirir, sazın səsini milli yaddaşın, mənəvi varlığın daşıyıcısına çevirirdi.

Tədbirdə çıxış edən filologiya üzrə fəlsəfə doktoru, dosent, aşıqşünas İlhamə Qəsəbova diqqətə çatdırıb ki, konsert proqramı “Sazın dörd üzü” konsepsiyası üzərində qurulur. Bu konsepsiya klassik aşıq sənətinin dörd əsas müstəvisini göstərir: Saz - müqəddəs və ritual simvol, saz - söz poeziyanın daşıyıcısı, saz - dastan tarixi yaddaşın qoruyucusu və saz - məclis, ünsiyyət və sosial birlik vasitəsi kimi.

Onun sözlərinə görə, saz məclis mədəniyyətində insanları bir araya gətirən, paylaşım və canlı ünsiyyət yaradan sənət nümunəsidir.

Daha sonra konsert proqramında klassik aşıq havaları səsləndirilib. Aşıq Çingiz Mehdipur, Aşıq İlham Aslanbəyli, Aşıq Şaiq İncəli, Aşıq Nazim Quliyev, Aşıq Elməddin Məmmədli, Aşıq Nargilə Mehdiyeva, Aşıq Eldar Bağırov, Aşıq Əli Zeynalabdinov və Aşıq Vüqar Kamandaroğlu klassik aşıq havaları təqdim ediblər.

Sonda aşıqlardan ibarət xor ifa edib.