Bəzən insanın gördüyü xeyirxah işlər sükutla, ad-san gözləmədən həyata keçirilir. Amma həmin insanın adı gündəmə gəldikdə, illərlə qurduğu etibar, yaratdığı dəyərlər və minlərlə insanın həyatına toxunan fəaliyyəti hər şeydən əvvəl xatırlanmalıdır. Məhz bu cür insanlardan biri də Palmali Şirkətlər Qrupunun İdarə Heyətinin sədri Mübariz Mənsimovdur.
Mübariz Mənsimov uzun illərdir fəaliyyətini xaricdə həyata keçirir. Beynəlxalq biznes mühitində qazandığı uğurlar ona yalnız iqtisadi güc deyil, həm də geniş sosial məsuliyyət hissi qazandırıb. O, həm Türkiyədə, həm də Azərbaycanda müxtəlif xeyriyyə layihələri ilə tanınır, ehtiyacı olan insanlara, ailələrə və sosial qruplara davamlı dəstək göstərir. Bu fəaliyyətlər çox zaman mediadan kənar, reklam edilmədən həyata keçirilir.
Eyni zamanda Mübariz Mənsimovun rəhbərlik etdiyi Palmali Şirkətlər Qrupu minlərlə insanı işlə təmin edib. Bu iş yerləri yalnız formal məşğulluq deyil, yüksək məbləğdə maaş, sosial təminat və stabil gəlir imkanları ilə seçilir. Onun yaratdığı biznes strukturları sayəsində minlərlə ailə dolanışığını təmin edir. Bu fakt özü-özlüyündə onun cəmiyyətə verdiyi real töhfənin ən bariz nümunəsidir.
Son günlər isə bəzi yazılı və vizual media orqanlarında Ekol TV adlı televiziya kanalı ilə bağlı yayılan və Mübariz Mənsimovun adı ilə əlaqələndirilən xəbərlər ictimaiyyətdə yanlış təəssürat yaratmağa yönəlib. Mübariz Mənsimov bu iddialara rəsmi sosial media hesabları üzərindən aydın və qəti mövqe bildirib. O, adı çəkilən televiziya kanalı ilə heç bir əlaqəsi olmadığını və bu məlumatlar tamamilə həqiqəti əks etdirmədiyini qeyd etmişdir.
Onun açıqlamasında vurğulanır ki, bu cür iddialar keçmişdə də müxtəlif formalarda gündəmə gətirilib və əsas məqsəd şəxsi nüfuzunu zədələmək, ictimai rəyə təsir göstərmək olub. Mübariz Mənsimov bu cür iftira xarakterli məlumatları qətiyyətlə pisləyir və ictimaiyyəti yalnız rəsmi və dəqiq mənbələrə istinad etməyə çağırır.
Uzun illərdir həm iş dünyasında, həm də sosial müstəvidə etibar qazanmış bir şəxsə qarşı əsassız iddiaların irəli sürülməsi nə ictimai maraqlara, nə də etik jurnalistika prinsiplərinə xidmət edir. Xeyriyyəçiliyi, sosial məsuliyyəti və minlərlə insanın həyatına verdiyi töhfə ilə tanınan Mübariz Mənsimovun adına kölgə salmaq cəhdləri həqiqəti dəyişmir.
Nəticə etibarilə, Mübariz Mənsimovun Ekol TV ilə heç bir əlaqəsi yoxdur və bu barədə yayılan məlumatlar əsassızdır. O, fəaliyyətini xaricdə davam etdirməklə yanaşı, Türkiyə və Azərbaycanda xeyriyyəçilik missiyasını və minlərlə insan üçün yaratdığı dəyəri bundan sonra da davam etdirəcək. Şəxsiyyətinə və nüfuzuna yönələn bu cür iddialar onun illərlə qurduğu etibarı sarsıda bilməz.

Şərafəddin İlkin,
Şair-publisist, Azərbaycan Yazıçılar Birliyinin üzvü,
Prezident təqaüdçüsü, "Beynəlxalq Rəsul Rza mükafatı" laureatı.