Bəzən arzuların çiçək tumurcuğu həyatın amansızlığına vaxtsız tuş gəlir. Bu arzuların qanadlarında sınmış ümidlər cənnətin isti qucağına üz tutanda ləçək-ləçək göz yaşlarına dönən talelər Tanrı dərgahına əl açır. Ancaq heyiflər olsun ki, Tanrı yaratdığı insana ayırdığı ömür payından əlavə heç nə pay vermir.
“Heç bir ümmət öz əcəlini qabaqlaya, nə də yubada bilər” (“Qurani-Kərim”dən). Qucağına sığındığımız qəribəliklərlə dolu həyat. Qalın bir meşəyə bənzəyir. Uzaqdan baxanda çox gözəl görünür. İçərisinə girəndə isə adama sıxıntı gətirir. Bu sıxıntılı həyatın qəribə qanunları var. Bəxtin ağlı-qaralı günləri onu naxışladıqca daha da nazlanır, xatirə lövhəsinə öz yazılmamış qanunlarını həkk edir. Hər dəfə bu lövhələri seyr etdikcə zərbə almaqdan gözü qorxmuş adam kimi bəzən hisslərimizin əzablarına qoşulur, onu qorumaq üçün əlimizdən gələni edirik. Lakin bəzən elə, elə çarəsiz qalırıq ki...
Elmin Yahir oğlu Əhmədov da bizi bu günlərdə çarəsizliyə düçar etdi, bu dünyanı, doğmalarını tərk etdi.
O, 15 aprel 1996-cı ildə Ağsu rayonunun Kalva kəndində anadan olmuşdu. Böyüyüb boya başa çatandan sonra özünə rahat şərait yaratmaq istəyirdi ki, vətənimizin başının üstünü qara buludlar aldı. Qarabağımız işğal altında qaldı. Artıq 30 ilə yaxın düşmən tapdağında olan Vətən torpaqlarını azad etməyin vaxtı çatmışdı. Ölkə Prezidenti cənab İlham Əliyevin komandanlığı altında Müzəffər Ordumuz səfərbər olundu, əli silah tutan hər kəs torpaqlarımızın düşməndən alınması uğrunda başlanmış İkinci Qarabağ müharibəsinə yollandı. Könüllü gedənlərin arasında Elmin Əhmədov da var idi. O, Füzuli, Qubadlı, Zəngilan istiqamətlərində gedən döyüşlərdə iştirak etdi. Müharibədən sağ-salamat qayıtdı.
Artıq dinc yaşayışa qədəm qoymuşdu. Ailəsi , ata-anası kənddə yaşayırdı. Elminin qəlbində çox arzusu var idi. Amma…
Bu günlərdə Bakı-Şamaxı magistral yolunun 116 kilometrliyində onun əyləşdiyi maşına yüksək sürətlə şütüyən maşın çırpılmış, Qarabağ qazisi Elmin qəza nəticəsində faciəli surətdə həlak olmuşdur.
Elminin ailəsi Kalvada hörmətlə sayılan, kənddə yeri və sözü olan, dəyərli əhatəsi, səviyyəli dostları ilə seçilən və sevilən işgüzar nəsillərdən idi. Elmin dostları arasında böyük nüfuza malik idi.



Ata məhəbbətinin qırılmaz telləri Elmini valideynlərindən əvvəl özünü əbədiliyin qucağına atdı. Elmin hər yerdə birinci olduğu kimi, ölümə də birinci qucaq açdı. Dik baxdı Əzrailin gözünə. Bilirdi ki, valideynləri o məkanın tezliklə qonağı olacaqlar. Bu dünyada özünə bəlkə də yer tapa bilməyəcəyi təqdirdə onlardan tez tələsdi. Tələsdi ki, balideynləri onun qucağına baş qoyub rahat uyusun.
Və uzaqdan ..... lap uzaqdan .... göylərə bir nalə səsi eşidilir. Bu nalə, bəli ... bu sanki Tanrıdan əzizlərini – atasını , qardaşını soraqlaşan, həsrətdən, dərddən qıvrılıb yananların nalələridir. O, incə vücudları ilə böyük dərdlərin çiynində çəkə bilməmələri , alışıb yanmalarıdır.... Allah səbrinizi versin!
Yerin Cənnət, ruhun şad, dünyan işıqlı olsun Elmin qardaşımız!
Bu faciədən möhkəm sarsılan Turaz.tv-nin əməkdaşları və Namiq Zülfüqarov Elmin Əhmədovun faciəli surətdə həlak olmasından kədərləndiyini bildirir və mərhumun ailəsinə dərin hüznlə başsağlığı verir.

NAMİQ ZÜLFÜQAROV