BU YAĞIŞ DEYƏSƏN QAR GƏTİRƏCƏK

Xəbərlər

14.12.2025, 15:19

BU YAĞIŞ DEYƏSƏN QAR GƏTİRƏCƏK - FOTO

ƏZİZƏ AĞAHÜSEYNQIZI

Dəyərli Muxtar Kərimzadə yə təşəkkür edirəm..

Dayanmır, səngimir, kəsmir, kirimir,
Bu yağış deyəsən qar gətirəcək.
Sarı həsrətimi silmir, kürümür,
Bu yağış deyəsən qar gətirəcək.

Rüzgarın boz üzû dönəndən bəri,
Payızın istisi sönəndən bəri,
Yağır üzü üstə dünəndən bəri,
Bu yağış deyəsən qar gətirəcək.

Göylərin mələyi o addan gəlir,
Həzin musiqili bir uddan gəlir,
Bu yağıs o qara buluddan gəlir,
Bu yağış deyəsən qar gətirəcək.

Şimsək alovunda qovrulan odu,
Göydən yerə qədər sovrulan odu,
Dərdiylə, qəmiylə yoğrulan odu,
Bu yağış deyəsən qar gətirəcək.

Bir əli payızda, biri qışdadı,
Leysanı, gurşadı elə qış dadı,
Payızı qorxudub küncə qısdadı,
Bu yağış deyəsən qar gətirəcək.

Ruhumdu, bal kimi süzülüb gəlir,
Kövrək buludlardan üzülüb gəlir,
Misrama, bəndimə düzülüb gəlir,
Bu yağış deyəsən qar gətirəcək.

Torpağa qol çəkib, imza atacaq,
Arzu, istəyinə yağıb çatacaq,
Gümüşü rənginə ağlıq qatacaq,
Bu yağıs deyəsən qar gətirəcək .

Kürəyi payıza, üzü qışadı,
Ürəyi doludu, sözü qışadı,
Ələndi varağa, yağdı, yaşadı,
Bu yağış deyəsən qar gətirəcək .
Bu yağış deyəsən qar gətirəcək .

13.12.2025