Şərqi İngiltərə Universiteti (UEA) və Oksford BioDynamics şirkətinin alimləri xroniki yorğunluq sindromu (ME/CFS) üçün yüksək dəqiqlikli qan testi hazırlayıblar. Yeni test xəstəliyi 96 faiz dəqiqliklə müəyyən edə bilir və bu, diaqnoz prosesində böyük irəliləyiş hesab olunur.

AZƏRTAC “scitechdaily.com” portalına istinadla xəbər verir ki, ME/CFS uzunmüddətli və zəiflədici xəstəlikdir, bütün dünyada milyonlarla insana, o cümlədən Böyük Britaniyada 400 mindən çox şəxsə təsir edir. İndiyə qədər bu xəstəliyin etibarlı diaqnostik üsulu mövcud deyildi.

UEA-nın professoru Dmitri Pşejetski bildirib ki, bu test ME/CFS xəstələri üçün ümid yaradır və daha erkən diaqnoz və müalicə imkanları aça bilər.

Test “Oxford BioDynamics-in EpiSwitch® 3D Genomics” texnologiyası əsasında hazırlanıb. Alimlər ME/CFS xəstələrindən və sağlam şəxslərdən götürülmüş qan nümunələrində DNT-nin üçölçülü qatlanma formasını analiz ediblər. Nəticədə xəstələrdə sağlam insanlarda olmayan xüsusi DNT “qıvrım” nümunələri aşkar edilib. Tədqiqatın nəticələrinə görə, test ME/CFS-ni 92 faiz həssaslıq və 98 faiz spesifikliklə müəyyən edir. Bu, həm xəstəliyi olan, həm də olmayan insanların dəqiq ayırd edilə bildiyini göstərir. Alimlər hesab edirlər ki, metod gələcəkdə uzunmüddətli COVID diaqnozu üçün də oxşar qan testinin yaradılmasına yol aça bilər.