Xəbər verdiyimiz kimi, ötən həftə 19 türkiyəli məşhurdan götürülən narkotestlərin nəticələri açıqlanıb və onlardan bəzilərinin qanlarında narkotik maddə müəyyən edilib.

“Qafqazinfo”nun “Haberler”ə istinadən məlumatına görə, qanında narkotik maddə aşkarlanan aktrisa Birce Akalay nəticəyə etiraz edəcəyini açıqlayıb.

“Sizə bildirmək istəyirəm ki, ən qısa zamanda vəkilim vasitəsilə Məhkəmə Tibbi Ekspertizanın rəyinə etiraz edəcəyəm, təbii ki, əgər doğrudursa. Hörmətlə”, - deyə aktrisa bildirib.


Narkotest nəticələri müsbət çıxan digər tanınmışlar isə aktrisa Defne Samyelinin qızları Deren və Derin Taludur.

Deren Talu nəticə ilə bağlı instaqram hesabında açıqlama yayıb: “Şokdayam. Həyatımda heç vaxt narkotik istifadə etməmişəm. Nəticələr doğru deyil. Birinin adını qaralamaq bu qədər asandırmı? Yalnız qanımdakı sertralinlə bağlı nəticə doğrudur, mənim qəbul etdiyim antidepressant dərmanlardır. Bir daha anladım ki, antidepressanlartdan istifadə etmədən bu ölkədə yaşamaq mümkün deyil. Başqa xəstəxanada yenidən testdən keçəcəyəm və adımın qaralanmasına icazə verməyəcəyəm”.

Defne Samyeli isə Məhkəmə Tibbi Ekspertizanın rəyinə inanmadığını söyləyib: “Mən təkcə narkotikə deyil, hətta siqaretə də qadağa qoyulmasını müdafiə edən biriyəm. Narkotiklərin qanunsuz dövriyyəsi, yayılması ilə mübarizədə dövlətin effektivliyi artıq böyük bir sual altındadır. Bu insanların tez-tələsik necə aşkara çıxarıldığı, barələrində şikayətin necə verildiyi barədə bizə, ailələrə məlumat verilməyib. Başqa bir xəstəxanada uşaqlarım üçün bu testləri yenidən aparacağıq”.