“Real Madrid”in hücumçusu Rodriqo komandadakı gələcəyi ilə bağlı açıqlama verib.

"Turaztv.az" “Qafqazinfo”-ya istinadən xəbər verir ki, braziliyalı futbolçu “AS” nəşrinə müsahibəsində klubda qalmaqda qərarlı olduğunu bildirib.

“Mən həmişə demişəm ki, klub məni heyətində görmək istədiyi müddətdə buradayam. Əgər bir gün desələr ki, “Rodriqo, özünə yeni komanda tap”, belə olan halda, mən sadəcə “yaxşı” deyərəm. Amma bu, hələ baş verməyib. Klub həmişə mənə inanıb və çətin vaxtlarımda dəstək olub. İnsanlar mənim sükutumdan nəticə çıxarırlar, amma mən “Real”a maksimumu verməyə fokuslanmışam”, – deyə o qeyd edib.

Xatırladaq ki, 24 yaşlı futbolçu cari mövsümdə Madrid təmsilçisinin heyətində 8 oyunda meydana çıxıb və 2 məhsuldar ötürmə ilə yadda qalıb. Rodriqonun “Real Madrid”lə müqaviləsi 2028-ci ilin ortalarınadək qüvvədədir.