Böyük Britaniya vəliəhdi, Uels şahzadəsi Uilyam kral olduqdan sonra monarxiyada dəyişikliklər edəcəyini bildirib.

"Turaztv.az" “Qafqazinfo”-ya istinadən xəbər verir ki, o, bu barədə “Apple TV+” platformasında yayımlanan “The Reluctant Traveller” verilişi üçün Vindzor qəsrində verdiyi müsahibədə deyib. Saray mənbələri bu müsahibəni şahzadənin indiyə qədər verdiyi ən səmimi açıqlamalardan biri adlandırıb.

“Dəyişiklik gündəliyimdədir. Mən bunu qəbul edirəm, bundan zövq alıram və qorxmuram. Müəyyən dəyişiklikləri etmək imkanı məni həyəcanlandırır. Çox radikal olmasa da, lazım olan dəyişiklikləri etmək niyyətindəyəm”, - deyə şahzadə bildirib.

O, ənənələrin önəmini vurğulasa da, monarxiyanın dövrün tələblərinə uyğun qalması üçün suallar verməkdən çəkinmədiyini deyib: “Bəzən ənənəyə baxıb soruşmaq lazımdır. Bu gün də məqsədəuyğundurmu? Bu, hələ də doğru addımdırmı? Biz həqiqətən təsirli ola bilirikmi? Mənim demək istədiyim odur ki, sual verməyi sevirəm”.