İtaliyanın əmək nazirinin müavini və Liqa partiyasının nümayəndəsi Klaudio Duriqon ABŞ-ın Avropa ixracatına rüsum tətbiq etməsində günahı Avropa Komissiyasının rəhbəri Ursula fon der Lyayenin üzərinə atıb.

"Turaztv.az" "Unikal"-a istinadən xəbər verir ki, Duriqon əlavə edib ki, Liqa ABŞ prezidenti Donald Trampın miqrasiya və iqtisadiyyatın qorunması ilə bağlı mövqeyini bölüşür. Eyni zamanda o, Brüsselin sərt mövqeyinə qarşı çıxıb:


"Biz bu vəziyyətə fon der Lyayenin rəhbərlik etdiyi Avropaya görə düşdük. Onun siyasəti əvvəldən uğursuz oldu - avtomobil sektorunu və "yaşıl keçidi" xatırlayın. Bütün bunlar iş yerlərinin itirilməsinə gətirib çıxarır. İndi də o, ABŞ-la danışıqlar aparır. Biz cavab tarifləri təhlükəsini dəstəkləmirik. Aİ ölkələrə danışıqlarda daha çox azadlıq verməlidir", - deyə nazir müavini bildirib.

Qeyd edək ki, İtaliyanın baş naziri Corciya Meloni də "yaşıl keçid"ə şübhə ilə yanaşır və bunu "zərərli ideologiya" adlandırır.