Məşhur usta Antonio Stradivarinin İkinci Dünya müharibəsi zamanı oğurlanmış skripkası Tokioda tapılıb.

Bu barədə AZƏRTAC “The New York Times”a istinadla xəbər verir.

“Mendelson” aləti 1709-cu ildə hazırlanmış və saxlanmaq üçün Mendelson-Bonke ailəsinə verilmiş, lakin müharibə zamanı itmiş və ailənin onu tapmaq üçün edilən cəhdləri uğursuz olmuşdur.

Skripkanı mədəniyyət üzrə mütəxəssis Karla Çapro tanıyıb. O, 2018-ci ildə Yaponiyada keçirilən Stradivari alətləri sərgisindən fotoşəkilləri nəzərdən keçirib. Orada skripkanın adı Stelladır və onun 1707-ci ildə hazırlandığı bildirilir.

Ekspert fotoşəkilləri orijinal skripkanın şəkilləri ilə müqayisə edib və ağacın teksturasına əsaslanaraq onun “Mendelson” olduğunu müəyyən edib. Alət 2000-ci ildə Nyu-Yorkdakı hərracda satılıb və 1,5 milyon dollar dəyərində qiymətləndirilib. 2021-ci ilə olan vəziyyətə görə dünyada təxminən 650 Stradivari aləti, o cümlədən 450 skripka qalıb.