Mayın 30-da Naxçıvan şəhərindəki Naxçıvanqala Tarix-Memarlıq Muzey Kompleksində “Göycə Festivalı” işinə başlayıb.

AZƏRTAC-ın bölgə müxbiri xəbər verir ki, festivalın açılış tədbirində Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəsi Fuad Nəcəfli, dövlət və hökumət rəsmiləri, “Qlobal informasiya mühiti və media trendləri” konfransı – “MEDİAFEST-2025”in iştirakçıları, eləcə də ictimaiyyət nümayəndələri iştirak ediblər.

Naxçıvan Şəhər Uşaq Musiqi və İncəsənət Məktəbinin şagirdləri maraqlı kompozisiya ilə festival iştirakçılarını qarşılayıblar. Naxçıvan şəhər 11 nömrəli uşaq bağçasının fidanları qonaqlara göycə təqdim ediblər. Meydanda quraşdırılmış monitorda Ümummilli Lider Heydər Əliyevin Naxçıvan göycəsi ilə bağlı jurnalistlərlə səmimi söhbəti izlənilib. Sonra səlahiyyətli nümayəndə və qonaqlar Naxçıvanqala ərazisindəki rəngarəng stendlərlə tanış olublar. Muxtar respublikanın ayrı-ayrı bölgələrində fəaliyyət göstərən sahibkarlar və məhsul istehsalçıları tərəfindən təşkil olunan stendlərdə muxtar respublikanın hər bölgəsinə xas göycə növləri, onlardan hazırlanan müxtəlif məhsullar təqdim olunub. Həmçinin, diyarın tarixi-mədəni irsi və turizm potensialı nümayiş etdirilib.

Festival iştirakçıları təsərrüfat və incəsənət adamları ilə söhbət ediblər.

Festival işini sabah da davam etdirəcək.

18:02

Muxtar respublikadakı “Naxçıvanqala” Tarix-Memarlıq Muzey Kompleksində “Göycə" festivalı keçirilir.

AZƏRTAC-ın bölgə müxbiri xəbər verir ki, festival çərçivəsində muxtar respublikanın şəhər və rayonları üzrə stendlərdə bölgələrin dadlı və təbii göycələri, onlardan hazırlanan məhsullar, tarixi-mədəni irs və turizm potensialı təqdim olunur. Festivalı ziyarət edənlər arasında Naxçıvanda keçirilən “Qlobal informasiya mühiti və media trendləri” konfransı – “MEDİAFEST-2025”-in iştirakçıları da var.

“Göycə" festivalı sabah da davam edəcək.