Xatirələrdə yaşayan doktor Əflatun Bayramov

Xəbərlər

15.05.2025, 00:56

Xatirələrdə yaşayan doktor Əflatun Bayramov - FOTO

AKİF HACIYEV,
Azərbaycan Memarlıq və İnşaat Universitetinin Dosenti

Ötən əsrin 60-70-ci illərində Qəbələ rayonunda əhalinin sağlamlığı keşiyində dayanan ağ xalatlı,əli şəfalı həkimlərdən biri də kardioloq
Əflatun Bayramov idi.

Əflatun Bayramov 1929-cu il mayın 15-də Tərtər rayonunun Evoğlu kəndində anadan olub. Gənclik illərində xoş bir təsadüf nəticəsində yolu Qəbələdən düşüb. İlk baxışdan bu yerlərin təbiəti, zəhmətkeş insanları onu valeh edib və o, gələcək ömür yolunu bu rayonla bağlamaq qərarına gəlib.

Beləliklə, bir müddət keçdikdən sonra Əflatun Bayramov rayon mərkəzi xəstəxanasında işə düzəlmiş və ixtisasca həkim olan Şəfiqə adlı bir xanımla ailə qurmuşdu. 1963-1969-cu illərdə isə Azərbaycan Tibb Universitetinin müalicə-profilaktika fakültəsində təhsil almışdı.
Tibb Universitetini əla və yaxşı qiymətlərlə bitirən Əflatun Bayramovu Qəbələdə hamı ürək-damar xəstəlikləri üzrə ən savadlı, işini gözəl bilən kardioloq kimi tanıyırdı. O, indiki müasir tibb aparatlarının olmadığı bir dövrdə pasiyentlər üzərindəki müayinələrini Tibb Universitetində öyrəndiyi nəzəri biliklərlə, tibbə aid oxuduğu yeniliklərlə düzgün aparardı. Əli hər yerdən üzülən xəstələr, hətta ətraf rayonlardan---Ağdaşdan, Oğuzdan, İsmayıllıdan onun yanına pənah gətirərdilər.
Əflatun doktor həkim peşəsi ilə yanaşı, sadəliyi, səmimiliyi, təvazökarlığı ilə də gözəl xüsusiyyətlərə malik bir insan idi. Rayonun xeyrindən, şərindən heç vaxt qalmazdı. Halal zəhməti ilə dolanan Əflatun doktor həm də gözəl ailə başçısı idi.
O, 1977-ci il dekabrın 26-da tanınmış bir həkim kimi ömrünün çiçəkləndiyi 48 yaşında qəflətən vəfat etmişdir.
Mehribançılığı, səmimiyyəti, gözəl qəlbi, qayğıkeş münasibəti ilə yaddaşlarda qalan Əflatun Bayramova Allah rəhmət eləsin, ruhu şad, məkanı cənnət olsun!
Onun əziz xatirəsi bu gün övladlarının, nəvələrinin, qohumlarının, dost, tanışlarının, onu yaxından tanıyanların qəlbində yaşayır...