Futbol üzrə Misli Premyer Liqasında XXXIV tura yekun vurulub.

Turaztv.az AZƏRTAC-a istinadən xəbər verir ki, son oyun günündə iki qarşılaşma keçirilib.

Günün ilk matçı Tovuz şəhər stadionunda “Kəpəz” və “Sumqayıt” komandaları arasında olub. Qarşılaşma nominal meydan sahiblərinin 1:0 hesablı qələbəsi ilə yekunlaşıb. Rauf Hüseynli 11-ci dəqiqədə penalti zərbəsini dəqiq yerinə yetirib.

Turun bağlanış oyununda çempion “Qarabağ” “Araz-Naxçıvan”ı qəbul edib. “Azersun Arena”da keçirilən görüşdə "köhlən atlar" rəqibi 2:0 hesabı ilə məğlub edib. Qolları 35-ci dəqiqədə Musa Qurbanlı, 59-cu dəqiqədə Aleksey Kaşuk vurublar.

Bu nəticələrdən sonra ağdamlılar 83 xalla turnir cədvəlində liderliyini davam etdirib, Naxçıvan təmsilçisi isə 55 xalla 3-cü sırada yer alıb.

Premyer Liqada qalacağı dəqiqləşən Gəncə klubu 32 xalla 8-ci, “gənclik şəhəri” təmsilçisi 30 xalla 9-cu pillədə qərarlaşıb.

Qeyd edək ki, turun əvvəlki oyunlarında “Sabah” “Şamaxı”ya 3:1, “Zirə” “Səbail”ə 1:0, “Neftçi” isə “Turan Tovuz”a 2:1 hesabı ilə qalib gəlib.