Niderlandın KLM aviaşirkəti yanacaq doldurulmasında istifadə edilən hissələrdə texniki nasazlıqlar səbəbindən "Boeing 787" təyyarələrində bəzi reysləri ləğv edib.

"Turaztv.az" “Report”-a istinadən xəbər verir ki, bu barədə NOS telekanalı məlumat yayıb.

Məlumata görə, şənbə günü Mexiko, Çikaqo və Portlendə üç "Boeing 787" reysi ləğv edilib. Çikaqo və Portlendə uçuşlar mayın 3-də digər təyyarələrdə gecikmələrlə yerinə yetiriləcək. Mexikoya gedən sərnişinlər bazar günü uça biləcəklər. Digər reyslərin ləğvi istisna olunmur.

Qeyd olunur ki, texniki problemlər təyyarəyə keyfiyyətsiz texniki xidmət göstərilməsi ilə bağlıdır: “Boeing-787”nin yoxlanılması protokolunun əvəzinə “Boeing-777” üçün nəzərdə tutulan prosedur həyata keçirilib.

"Bu hissə "Boeing 777"dəki ilə eyni olsa da, 787 modellərinə fərqli təlimatlar tətbiq olunur", - aviaşirkətin sözçüsü izah edib. Onun sözlərinə görə, bunun fonunda KLM yaxın vaxtlarda müvafiq protokola uyğun olaraq təyyarəyə yenidən texniki xidmət göstərəcək.

KLM-in donanması 228 təyyarədən ibarətdir. Onlardan 24-ü "Boeing 787"dir.