Xəbərlər
6.05.2026, 00:22
LİLPAR CƏMŞİDQIZI : Cənnətin ətrin duyandan bitməyir ünvanə eşq - FOTO
Ey qələm qaş, vermisən aləmdə hər insanə eşq,
Ol səbəbdən bəsləsin hər can gərək Rəhmanə eşq.
Dərdə düşmüş xəstələr can vermədən loğman gələr,
Çün yaratdın aşiqin qəlbində bir dərmanə eşq.
Canı canandan sorarlar, bir cəfakeşdən deyil,
Çox dağılmış xanədanlar saldı çün səhmanə eşq.
Sevgi camın nuş edənlər bir qədəhdən tam alar,
Ağrıdar qəlbin məhəbbət çıxmadan meydanə eşq.
Dən səpilmiş torpağın köksündə sünbül boylanar,
Sarı paltar, zülfü dən- dən yollanar xırmanə eşq.
Al gülabdan ətri çəkməz, çıxmamış candan o ruh,
Çünki, Allah göndəribdir qönçədən reyhanə eşq.
Bir qızın ismət tərindən damcı düşməz sevməsən,
Bəxş edib Canan əzəldən qızla bir oğlanə eşq.
Tutdu həsrət gözləməkdən Yəqubun ol dəm gözün,
Kəhkəşandan saldı meylin Yusifin zidanə eşq.
Lilparın könlündə sevda sönməyən atəş olub,
Cənnətin ətrin duyandan bitməyir ünvanə eşq.
Son xəbərlər
Ən çox oxunanlar
- Bu gün
- Bu həftə
- Bu ay
