Naxçıvan Dövlət Universitetinin (NDU) təşkilatçılığı, Naxçıvan Muxtar Respublikasının Təhsil Nazirliyi, Bakı Dövlət Universiteti və Azərbaycan Dövlət Pedaqoji Universitetinin tərəfdaşlığı ilə Azərbaycan Psixoloqlarının I Forumu keçirilib.

NDU-nun Media və ictimaiyyətlə əlaqələr şöbəsindən AZƏRTAC-ın bölgə müxbirinə bildirilib ki, forum iştirakçıları əvvəlcə Ümummilli Lider Heydər Əliyevin Naxçıvan şəhərinin mərkəzi meydanında ucalan abidəsini ziyarət edib, önünə gül dəstələri düzüblər.

Açılış mərasimində çıxış edən Naxçıvan Dövlət Universitetinin rektoru Elbrus İsayev forumun təşkilini yüksək qiymətləndirib.

“Əminik ki, bu forumdan əldə olunan nəticələr, nəşr ediləcək materiallar universitetin psixologiya ixtisasında tədrisin keyfiyyətini daha da yüksəltməklə yanaşı, ümumilikdə ölkədə bu sahənin inkişafına töhfə olacaq”, - deyə rektor bildirib.

Elbrus İsayev, həmçinin yaxın gələcəkdə universitetdə Psixologiya Mərkəzinin yaradılması ilə bağlı mühüm işlərin həyata keçirildiyini qeyd edib.

Sonra plenar çıxışlar olub, məruzələr dinlənilib.

Naxçıvan Muxtar Respublikasının təhsil naziri Elxan Nəcəfov məktəb psixoloqlarının fəaliyyəti, onların peşə bacarıqlarının artırılması istiqamətində görülən işlərdən bəhs edib. Gənc nəslin yetişməsində mühüm məsuliyyət daşıyan məktəb psixoloqlarının belə tədbirlərdə iştirakının önəminə diqqət çəkib.

Azərbaycan Dövlət Pedaqoji Universitetinin İbtidai təhsil fakültəsinin dekanı professor Qızxanım Qəhrəmanova, Türkiyənin Malatya Turqut Özal Universitetinin rektor köməkçisi professor İlhan Erdem, Yıldız Texniki Universitetinin rektor müşaviri professor Mehmet Engin Deniz məruzələrlə çıxış ediblər. Eyni zamanda, Azərbaycan Respublikası Təhsil İnstitutunun Psixologiya və xüsusi təhsil şöbəsinin müdiri dosent Elxan Bəylərov, Azərbaycan Dövlət Pedaqoji Universitetinin Şəki filialının elmi işlər üzrə direktor müavini dosent Nuralı Çələbiyev və Naxçıvan Dövlət Universitetinin Magistratura və Doktorantura Mərkəzinin direktoru Çapay Quliyev psixologiyada müasir yanaşmalara və yeni çağırışlara toxunaraq aktual məsələlərə dair başlıqlarda məruzələr təqdim ediblər.

Sonra plenar məruzəçilərinə NDU rektoru tərəfindən təşəkkürnamələr verilib.

Bölmə iclasları ilə davam edən forumda 7 istiqamətdə müzakirələr aparılıb.

Forum çərçivəsində xüsusilə təlim və vörkşoplar təşkil olunub.