“Borussiya Dortmund” futbol klubu 53 yaşlı xorvatiyalı Niko Kovaçı yeni baş məşqçi kimi rəsmi şəkildə təqdim edib.

Turaztv.az AZƏRTAC-a istinadən xəbər verir ki, Niko Kovaç mətbuat konfransında klubda fəaliyyəti ilə bağlı ilk qərarlarını açıqlayıb. Belə ki, komandanın kapitan sarğısını yenə Emre Can daşıyacaq. Kovaç bu barədə açıqlamasında bildirib: “Emreni yaxşı lider olaraq görürəm, alman milli komandasında və böyük klublarda çıxış edib. Ona tam inanıram”.

Niko Kovaç, həmçinin Niklas Sülenin də komandada qalacağını açıqlayıb. Baş məşqçi komandadakı hədəfləri barədə danışarkən deyib: “Əlbəttə ki, hədəfimiz maksimuma nail olmaqdır. Ancaq hazırda 11-ci sıradayıq. Buna görə də turnir cədvəlinə yox, ancaq nəticəyə baxırıq. Əzmkar və səbirli olmalıyıq”.

Qeyd edək ki, bu mövsüm qeyri-sabit çıxış edən komanda hazırda 29 xalla 11-ci sırada qərarlaşıb. Klub rəhbərliyi uğursuz çıxışa görə sabiq baş məşqçi Nuri Şahinlə yolları ayırıb.