Türkiyə bir neçə gündür şəhidlərini son mənzilə yola salmaqla məşğuldur. Keçirilən təntənəli dəfn mərasimləri gah şəhid övladlarının ürəkdağlayan görüntüləri, gah şəhid analarının nalələri, gah da əsgər atalarının qürurulu göz yaşları ilə yaddaşlara həkk olunur. Dünən Türkiyə mediasında yayılmış bir şəkil də böyük müzakirələrə səbəb olub.

Bizimyol.info xəbər verir ki, Suriyanın İdlib şəhərində Əsəd rejiminin hava hücumu zamanı şəhid olmuş zabit Emin Yıldırımın dəfn mərasimində maraqlı anlar qeydə alınıb. Mərasim zamanı leysan yağış başlayıb və şəhidin cənazəsi başında növbə tutan əsgər farağat vəziyyətində dayandığı üçün yağış onu isladıb. Bu anları görüb ürəyi dözməyən Serab Abbasoğulları adlı qadın öz çətirini açaraq, əsgərin başı üzərinə tutub və onu yağışdan qoruyub.

Bu anlar müxbirlərin gözündən yayınmayıb və qəzetlərdə manşetə çevrilib. Daha sonra bu hadisə barədə danışan Sərab xanım bildirib ki, fotonun çəkilməsindən xəbəri olmayıb.

“O şəhidimizin baş ucunda növbə çəkirdi. Leysan onu isladır, üzündən sular axırdı. Çətin vəziyyətdə idi. İki dəfə salfet uzatsam da təbii ki, götürə bilmədi. Mən də çətirimi açıb onun başı üzərinə tutdum. O an yanımda olan əmiqızlarım da mənim başıma öz çətirlərini tutdular. Mehmetcik bizim uğrumuzda canından keçir, biz onlar üçün bunu etmişik, çoxmu? Ən azından bir balaca faydam toxunsun istədim və bununla qürur duydum”,- deyə o bildirib.