Ukrayna Təhlükəsizlik Xidməti (UTX) Haaqa üçün Rusiya tərəfinin Ukraynanın mülki əhalisinə qarşı piyada əleyhinə minalardan “şüurlu şəkildə istifadə etdiyinə” dair genişmiqyaslı sübut bazası hazırlayır.

Turaztv.az “Report”-a istinadən xəbər verir ki, bu barədə UTX-nin mətbuat xidməti məlumat yayıb.

Qurum bildirib ki, müharibə başlayandan bəri Rusiya tərəfinin yerləşdirdiyi qurğuların partlaması sonucunda mindən çox dinc sakin xəsarət alıb, onlardan 297-si həlak olub. “Onların arasında çoxlu uşaqlar da var”, – məlumatda diqqətə çatdırılıb.

Yetərincə sübut əldə etdikdən sonra materialların Haaqa Beynəlxalq Cinayət Məhkəməsinə verilməsi məsələsinə qərar veriləcək.

İstintaq zamanı müəyyən edilib ki, Rusiya hərbçiləri “döyüş zonasında yerləşən yaşayış məntəqələrinin yaxınlığında və ya ərazilərində məqsədli şəkildə mina tələləri qurur”. İddia olunur ki, sursatları ört-basdır etmək üçün onlar müxtəlif istehlak mallarından, o cümlədən uşaq oyuncaqlarından və şirniyyat qutularından istifadə edirlər.