Məşhur ekstrasens-görücü Zirəddin Rzayev Azərbaycanda qarşıdan gələn parlament seçkilərindən tutmuş, ona müraciət edən məmurlara qədər bir çox məsələlərlə bağlı fikirlərini bölüşüb. O, bu haqda “İri Plan” “Youtube” kanalında sualları cavablandırarkən danışıb.
Bizimyol.info xəbər verir ki, Z.Rzayev 2020-ci ilin 2019-dan elə də böyük fərqi olmayacağını düşünür.

Azərbaycanda fevralın 9-da keçiriləcək deputat seçkilərinə münasibət bildirən ekstrasens konkret müğənni-bəstəkar Elza Seyidcahanın namizədliyi haqda sualı cavablandırıb. Deyib ki, Elzanın deputat olmasını çox istərdi: “Amma təəssüf ki, bu seçimlərdə onu millət vəkili kimi görmürəm. Mən çox istərdim ki, yanılım, onu millət vəkili kimi görüm. Amma hələlik görmələrim mənə onun millət vəkili olacağını göstərmir”.

Z.Rzayev daha sonra məşhurların, o cümlədən vəzifəli şəxslərin falçılara, ekstrasenslərə müraciət etməsi haqda danışıb. Onun sözlərinə görə, Azərbaycandakı məmurların 90 faizi ona müraciət edir: “Bu yaxınlarda “Youtube”da bir videoya rası gəldim. Görücülərdən biri Fazil Məmmədovun (keçmiş vergilər naziri-red.) ona müraciət elədiyini danışırdı. Deyirdi ki, “mən onun üçün bunları elədim, mənə pul verirdi”. Heç vaxt bir kişi, bir mütəxəssis, bir insan kiminsə sirrini o, vəzifədən çıxandan sonra açıb danışmamalıdır. Mənə də çox müraciətlər olub. Azərbaycanda görüşmədiyim məmurlar qalmayıb. Məmurlardan mənim yanımda olmayan adam qalmayıb. Demək olar ki, yüzdə doxsanı mənə müraciət edib. Onların vəzifədən çıxanı da var. Mən indi də onlarla münasibətdəyəm, dostluqdayam, hörmətim böyükdür. Səhəri gün kimsə vəzifədən çıxarılandan sonra həmin adamın mənim yanımda olduğunu ictimailəşdirsəm, heç bir məmur mənə müraciət eləməyəcək. İkinci bir məmur mənə inanmayacaq, güvənməyəcək”.