SÜBHAN KAMALOĞLU: BİR ÖMÜR YAŞADIQ

Xəbərlər

1.08.2023, 22:41

SÜBHAN KAMALOĞLU: BİR ÖMÜR YAŞADIQ - FOTO

QONŞU QIZ

Nə gözəl yaradıb Yaradan səni,
Gözəllər içində birsən, qonşu qız.
Həyatım səninlə mənalanıbdı,
Odsan alovsan,nursan,qonşu qız.

Səhərlər günəşlə çıxırsan qoşa,
İzin ver hüsnünə edim tamaşa.
Gizlən ürəyimdə,əbədi yaşa,
Sevgi dünyamızda şirsən,qonşu qız.

Sübhanın qəlbini döndərmə qana,
Baxmasan olacaq o şana-şana.
Nazın sığışmayır bütün cahana,
İncisən, gövhərsən, dürsən, qonşu qız.

GÜLÜM

Gəl gedək Qazağa, çıxaq yaylağa,
Könlündə məhəbbət oyansın,gülüm.
Qaymaq dodaqların, gül yanaqların,
Gül-çiçək ətrinə boyansın,gülüm.

Qara gözlər yenə durub qəsdimə,
Alovlandım,qərq olmuşam tüstümə.
Gül hüsnündən bir işıq sal üstümə,
Oyat,yatan bəxtim oyansın,gülüm.

Mən sənsiz neylərəm bu xanimanı,
Gözünlə görürəm bütün dünyanı,
Sevgi ver,eşqinlə yaşat Sübhanı,
Omrümə qoy ömür calansın, gülüm.

BİR ÖMÜR YAŞADIQ

Bir ömür yaşadıq,yaxşımı,pismi,
Nə mən soruşmadım, nə sən demədin.
Mən səndən razıyam,sən məndən necə?
Danışsam danışdın, sussam dinmədin,
Nə mən soruşmadım, nə sən demədin.

Yanımda var oldun,çətində,darda,
Qoşa addımladıq boranda, qarda,
Arabir yorulub, qaldıq yollarda,
Bəlkə də qəlbində küsdün,incidin,
Nə mən soruşmadım,nə sən demədin.

Çalışdım, vuruşdum, keçdi ömür-gün,
İnsan yaranandan həyata sürgün.
Qəlbinə dəyəndə niyə, nə üçün,
Mənim bildiyimi səndə bilirdin,
Nə mən soruşmadım,nə sən demədin.

Üç övlad payımız gəldi dünyaya,
Qol-qanad açdılar ulduza-aya,
Verib gəncliyini hər ilə, aya,
Böyütdün onları,anayam dedin,
Nə mən soruşmadım,nə sən demədin.

Ömrümün gülü də, çiçəyi də sən,
Elimin gözəli, göyçəyi də sən,
Sübhanın döyünən ürəyidə sən,
Mən gözəl sevirdim, sən gözəl sevdin,
Nə mən soruşmadım, nə sən demədin.