Albaniyanın paytaxtı Tiranada güləş üzrə U-17 Avropa çempionatı sona yaxınlaşır.

Azərbaycan Güləş Federasiyasından AZƏRTAC-a bildiriblər ki, yarışın altıncı günündə 45, 51, 60, 71 və 92 kiloqram çəki dərəcələrində yer alan sərbəst güləşçilər döşəyə çıxıblar.

Cəfər Cəfərov (45 kq) debütdə türkiyəli Əbubəkr Gür üzərində inamlı qələbə qazanıb - 16:7. Güləşçimiz ermənistanlı Armen Papikyana tam üstünlüklə (10:0) qalib gələrək yarımfinala yüksəlib. polşalı Pavlo İlnitski isə C.Cəfərovun qarşısında cəmi 35 saniyə duruş gətirə bilib – 10:0. Cəfər finalda gürcüstanlı Mate Tsinadzeylə güləşəcək.

Seyhun Əlizadə (51 kq) səkkizdəbir finalda ermənistanlı Saşa Petrosyanla bacarmayıb - 2:15. Rəqib finala yüksəldiyi üçün Əlizadə təsəlliverici görüşdə britaniyalı Danuş Yovkarla qarşılaşacaq.

Camal Abbasov (60 kq) isə səkkizdəbir finalda fransalı Abdullah Nakayevə heç bir şans verməyib - 11:0. Gəncə güləş məktəbinin yetirməsi yunanıstanlı Flippos Psoması da 6:0 hesabı ilə xalçadan məyus yola salıb. Abbasov yarımfinalda türkiyəli Vahid Yılmaza vaxtından əvvəl (10:0) qalib gəlib və ikinci dəfə Avropa çempionatının finalına yüksəlib. Həlledici görüşdə Camalın rəqibi rusiyalı Akramat Şakriyev olacaq.

İsmayıl Rəhimli (71 kq) litvalı Arnas Linkeviçyusa 10:0 hesabı ilə qalib gəlsə də, dörddəbir finalda ermənistanlı Narek Nikoqosyana minimal fərqlə (2:3) məğlub olub. Rəqibin finaladək irəliləməsi Rəhimliyə bürünc medal qazanmaq şansı yaradıb. İsmayıl təsəlliverici görüşdə gürcüstanlı Yoseb Mefarişviliylə üz-üzə gələcək.

Səid Paşayev (92 kq) isə təsnifat mərhələsində türkiyəli Eyyup Çətinə müqavimət göstərə bilməyib - 2:13. Rəqib finala yüksəldiyi üçün Paşayev təsəlliverici görüşdə iştirak hüququ qazanıb. Səid belaruslu Aleksey Kulakovla güləşəcək.