Türkiyə Prezidenti Rəcəb Tayyib Ərdoğan mayın 14-də keçirilən seçkilərdə ATA ittifaqının prezidentliyə namizədi olan Sinan Oğan ilə görüşüb.

AZƏRTAC Anadolu agentliyinə istinadla xəbər verir ki, Dolmabahçe iş ofisində mətbuata bağlı keçən görüş 1 saata yaxın çəkib.

Görüşdən sonra hər hansı açıqlama verilməyib.

Qeyd edək ki, Türkiyə Ali Seçki Komissiyası mayın 14-də keçirilmiş prezident seçkilərinin birinci turunun yekun nəticələrini açıqlayıb. Yekun nəticəyə əsasən, Rəcəb Tayyib Ərdoğan 49,52 faiz, Kamal Kılıçdaroğlu 44,88 faiz, Sinan Oğan 5,17 faiz, Muharrəm İncə isə 0,43 faiz səs qazanıb. Namizədlərdən heç biri 50 faizdən çox səs toplamadığı üçün mayın 28-də səsvermənin ikinci turu keçiriləcək. Bu mərhələdə R.T.Ərdoğan və “Millət İttifaqı”nın namizədi, müxalif Cümhuriyyət Xalq Partiyasının sədri Kamal Kılıçdaroğlu mübarizə aparacaq.