Xankəndi ətrafında, erməni separatçılarının növbəti təxribatının qarşısı alınarkən, baş verən silahlı insident nəticəsində, Azərbaycan ordusunun iki hərbçisi qəhrəmancasına şəhid olub. Allah rəhmət eləsin.
Rusiya XİN Lavrovun Bakıda, 10 noyabr sazişini xatırladaraq ,,Laçın yolunda sərhəd-keçid məntəqələri nəzərdə tutulmayıb " deməsinin ardından, separatçı rejimin martın 5-də silahlı insident hadisəsi törədərək və ardınca yeni təyinat almış dırnaq arası dövlət naziri Qurqen Nersisyanın hadisə ilə bağlı sərsəm açıqlaması, bizə əsas verir ki deyək, hadisələrin baş verməsinə imkan yaradan Rusiyadır və proseslərə nəzarət edən və separatçı rejimi ruhlandıran, onlara dəstək verən sülhməramlı adı ilə yerləşən rus hərbi qüvvələridir. Hətta vəziyyət o həddə çatıb ki, separatçı rejimin,, rəhbərliyi " Azərbaycanı təhdid edərək,, istənilən hucuma qarşı layiqli cavab vermək və amansızcasına cəzalandırılsın,,əmri verilib. Bunun arxasında duranları isə Azərbaycan dövləti yaxşı tanıyır və lazımı tədbirlər mütləq ki, dövlətimiz tərəfindən alınmışdır.
Əyər Lavrovun dediyi kimi məsələlərə, 10- noyabr sazişindən yanaşmaq lazım gələrsə, görəsən 10- noyabr sazişindən irəli gələn digər məsələlər nə üçün Rusiyanın sevimlisi olan Ermənistan tərəfindən iki ildən artıqdır ki, görməzdən gəlinərək yerinə yetirilmir? Rusiya üçüncü tərəf kimi öz üzərinə götürdüyü öhdəlikləri yerinə yetirməyə borclu deyilmi? Rusiyanın sülhməramlı kontingenti Qarabağda xüsusilə Xankəndidə separatizmi dəstəkləmirlərmi? Azərbaycanın bütün sülh səyləri və qəbul etdiyi kompromislər, məhz bu iki il ərzində sülhməramlı qüvvələrin mövcudluğu nəticəsində müsbət cavab tapa bilmir. Bunu bütün dünya bilir. Azərbaycan öz müstəqilliyini, suverenliyini və ərazi bütövlüyünü qəbul etdiyi konstitusiyaya əsasən qorumağa və bərpa etməyə çalışmamalıdır? Bizim sərhədlərimiz barədə Lavrov və digərlərinin fikir və düşüncələrinə bizim ehtiyacımız yoxdur. Laçın rayonu ərazisində yerləşən Ermənistanla sərhəddə mütləq ki, ölkəmizin konstitusiyasına uyğun olaraq sərhəd-keçid məntəqəsi qurulmalıdır. Bu Azərbaycan dövlətinin hüququdur. Bu hüququ bizim əlimizdən heç kim ala bilməz.