YAXŞI ADAM CƏLAL DADAŞOV HAQQINDA

Xəbərlər

16.02.2023, 00:32

YAXŞI ADAM CƏLAL DADAŞOV HAQQINDA - FOTO

YAXŞI ADAM CƏLAL DADAŞOV HAQQINDA

Bu yazı insanı, insanlığı, sevdiyi sənəti qiymətləndirməyi bacaran dostumuzun doğum gününə həsr olunur

Bilmirəm bu qaydanı kim tətbiq edib... Həyatımızda, taleyimizdə rolu olan insanlar, ürəyimizdə yer ayırdığımız dostlar barədə ancaq doğum günləri, yubiley mərasimi keçirilən anlarda yazı yazırıq. Adi günlərdə xoş söz demək, ürəyindən keçənləri dostlarla bölüşmək mümkün deyil?
Bu sözləri yazıram və məlum olur ki, ənənəni yenə pozmaq mümkün olmayacaq.

Cəlal Dadaşovla tanışlığımızın səbəbkarı, sözün həqiqi mənasında, böyük qəlbli insan, ədəbi yaradıcılığımızda dəst-xətti ilə öz möhürünü çoxdan vuran, gözəl dostumuz Cəmil müəllimdi. Məhz Cəmil müəllimin sayəsində yaranan bu tanışlıq arxada qoyduğumuz illər ərzində dostluğa çevrilib. Yel kimi ötən illər ərzində çox şey dəyişib. Təəssüf ki, bəzi dostlar da. Amma Cəlal Dadaşov ilk dəfə gördüyüm kimidi. Ailəsini, vətənini, işini, dostunu sevən. Bu sevginin qarşılığında heç bir təmənna güdməyən. 35 yaşı olsa da, qarşısındakı adamla, ona müraciət edən hər kəslə dünyagörmüş bir ağsaqqalın hərəkət və davranışlarını edir, ona ağayana münasibət göstərir. Onu hər zaman, bütün dostlarımız da daxil olmaqla mən onu belə görmüşəm. Nə Cəlalın, nə də atasının insanlara münasibəti dəyişib. Bu ailədən tanıdığım hər kəs olduqca zəhmətkeşdir, ünsiyyətcildir, qayğıkeşdir, onlar dostlarımıza qayğı və diqqətlə yanaşıblar. Mehribanlıq, səmimiyyət və ehtiram bu ailədən heç vaxt əskik olmayıb.
Cəlal Cəmil oğlu insan sərrafıdı. Dostluq etdiyi insanların arasında alim də var, yazıçı da, hüquq-mühafizə işçisi də, sənətçi də, jurnalist də, fəhlə də. Hərəsi də bir yaşda, bir xasiyyətdə. O, dostları ilə təkcə fəxr eləmir, sevincini bölüşür, dərdinə şərik çıxır.
Dostlardan biri də mənəm. Şad günlərimdə ilk yada salanlardan biri Cəlal olub. Bu yaxınlarda onda gördüyüm iki nüans məni həm heyrətləndirdi, həm də ona ürəyimdə əhsən dedim. Biri atası Cəmil müəllimlə “Bilgəh” sanatoriyasında qaldığımız müddətdə bizə göstərdiyi ülfət, qayğıdır, qardaşı Turalla birlikdə bizi istənilən anlarda yoluxdular, ehtiyaclarımızla maraqlandılar. Digər məqam isə təzə evimdə müəyyən təmir işləri var idi, onu görməkdə əsl ustalıq, məharət göstərdi. Əli qızıldır Cəlalın, maşallah, 100 ölçüb bir biçdiyi işə kiminsə şübhəsi ola bilməz. Atası Cəmil müəllimin ən ağır, kədərli günlərində onun yanımda görmüşəm. Təskinlik verib, məsləhətini əsirgəməyib, maddi və mənəvi dayaq olub.
Qəlbində dəyərli sözə həmişə xüsusi yer saxlayan insanlardandı Cəlal. Şair dostlarının hər misraları onun ürəyini rahatlayır. Ziyalı dostlarının hər bir cümləsi ona yeni nəfəs verir. Onu sevən dostlarının iik kəlamlarına sayğı göstərir. Hərbçi dostlarının hünəri, şücaəti onu torpağa, Qarabağa, Vətənə daha da bağlayır. Onunla birlikdə çalışan dostlarının şux zarafatları isə ona bulaq suyunun saflığını xatırladır.
Elə insanlar var ki, qanı sənin qanından olmasa da, sən cəmiyyət qarşısında onun mərdliyini, kişiliyini görmüsən, həmin adamlar haqqında hökmən nəsə yazmaq istəyirsən. Çünki həmin insanlardan gələn müsbət enerjini başqaları ilə paylaşmaq ehtiyacı hiss edirsən. Dostumuz Cəlal Dadaşov da belə insanlardandı. Onda o qədər həyat materialı var ki, rahatca oturub nəsə yazmaq olardı…
35 yaşı bu gün tamam olan Cəlal qardaşımız ailəlidir, bir qızın atasıdır. Ailəsinin çörəyini qazanarkən halallığı nəzərə alır, bütün çətinlikləri dəf etməyi bacarır. Hər dəfə rastlaşanda öz işindən həvəslə danışır, gördüyü işlərdən zövq alır. Deyir bu barmaqlar yaratmaqda çox şeyə qadirdir. Odur ki, Allah da onu ümidsiz qoymur, mükafatlanıdırır.
Bu gün Bakımızı nəhəng tikinti meydançasına bənzədirlər. Təbii ki, bu meydançada hər şey yerində deyil. Zövqlə görülən işlərlə yanaşı ürəyimizi ağrıdan mənzərələrə də rast gəlirik. Belə çatışmazlıqları görəndə Cəlal Cəmil oğlu Dadaşovun peşəkar inşaatçı, daş, rəng dilini bilən insan kimi necə həyəcan keçirdiyinin dəfələrlə şahidi olmuşam. İnşaat meydanlarında daim Cəlalın yeri görünür.
35-ci baharına əlvida deyib 36-ı qarşılayan Cəlal qardaşımızı təbrik edir, atası Cəmil müəllimə, ailə üzvlərinə gözaydınlığı verir, sağlamlıq, gümrahlıq və ailə xoşbəxtliyi arzulayırıq.

Təbrikə Cəmil müəllimin dostları adından Akif Rzayev, Arif Həsənov, Rahib Kərimli, Vidadi , Elyaz Yazan, Daşdəmir Əjdəroğlu və Cəlalı qəlbən sevənlər də qoşulurlar