Ovçu insaf elədi, şeytan alov püskürdü, ay Dədə Vurğun

Tanrım insafa gəl, bir nəzər eylə,
Alovda dönübdü büryana ceyran.
Balası kül oldu gözü önündə,
Qıyma öz külünə boyana ceyran.
.
Təbiət gözəli gəldimi gözə?
Sığmaz nə dastana, sığmaz nə sözə.
Gözdağı budumu çəkilir gözə,
Baş alıb de, qaçsın hayana ceyran?
.
Bir vaxt yaraşıqdı Muğan düzünə.
Bilməzdik od yağar cığır, izinə.
Qurban qan süzülən ahu gözünə,
Balası mələdən, vaay, ana ceyran.
.
Dədə Səməd Vurğun ağı söyləsin,
"O çöllər qızına" əlac eyləsin.
Əfşan bu acıya dözmür neyləsin,
Yandı diri-gözlü, oyy, ana ceyran.

Əfşan YUSİFQIZI
06.07.21