Prezident İlham Əliyevin tapşırıqlarına uyğun olaraq, məhkəmə sistemində islahatlar uğurla davam etdirilir, bu sahədə mühüm “yol xəritəsi” olan dövlətimizin başçısının 2019-cu il 3 aprel tarixli Fərmanının icrası ilə bağlı ardıcıl tədbirlər görülür. Məhkəmə infrastrukturunun müasirləşdirilməsi çərçivəsində rəqəmsal innovasiyalar tətbiq olunmaqla yüksək texnoloji – “hi-tech” məhkəmə bina və kompleksləri inşa olunaraq istifadəyə verilir. Sentyabrın 3-də Prezident İlham Əliyev Sumqayıt Məhkəmə Kompleksinin açılışını edib.

Turaztv.az AZƏRTAC-a istinadən xəbər verir ki, bu gün binada yaradılan şəraitlə tanış olmaq məqsədilə Ədliyyə Nazirliyi media tur təşkil edib. Media tur çərçivəsində Sumqayıt Apelyasiya Məhkəməsinin sədri Tofiq Paşayev Kompleksdə yaradılan şəraiti yüksək dəyərləndirib. O, kompleksdə hakimlər və məhkəmə aparatı işçiləri üçün bütün zəruri imkanlar, mükəmməl şərait yaradıldığın vurğulayıb.

"Eyni zamanda vətəndaşlar və tərəflər üçün də yaxşı şərait yaradılıb. İnformasiya və kommunikasiya texnikasının yerləşdirilməsi, ondan istifadə və müraciət zamanı məhkəmə proseslərinin gedişində İKT-dən istifadə nəzərdə tutulub. Burada 24 məhkəmə iclas zalının olması işlərin vaxtında təyin edilməsi, proseslərin ləngimədən keçirilməsi və süründürməçiliyin aradan qaldırılmasına gətirib çıxaracaq”, - deyən sədr bildirib ki, bu da şübhəsiz ki, vətəndaşlarımızı məmnun edəcək və onların hüquqlarının daha geniş müdafiəsinə zəmin yaradacaq.

“Yeni istifadəyə verilən məhkəmə kompleksində il ərzində 28-32 min işə baxılacaq”, - deyə Tofiq Paşayev əlavə edib.

Qeyd edək ki, binada Sumqayıt Apelyasiya Məhkəməsi, Ağır Cinayətlər Məhkəməsi, İnzibati Məhkəmə, Kommersiya Məhkəməsi, Sumqayıt Şəhər Məhkəməsi və müvəqqəti olaraq Qubadlı Rayon Məhkəməsi fəaliyyət göstərəcək.