Bu ilin yanvar-may aylarında Azərbaycanda 1238 əkiz, 36 üçəm doğulub.

Dövlət Statistika Komitəsindən Bizimyol.info saytına verilən məlumata görə, bu ilin 5 ayı ərzində Ədliyyə Nazirliyinin rayon (şəhər) qeydiyyat şöbələri tərəfindən 56 254 doğulan körpə qeydə alınıb.

Əhalinin hər 1000 nəfərinə bu göstərici ötən ilin müvafiq dövrü ilə müqayisədə dəyişməyərək eyni səviyyədə (13,7) qalıb. Körpələrdən 1238-i əkiz, 36-sı isə üçəm doğulanlardır.

Son illər körpələrin dünyaya gəlməsində süni mayalanma metodundan çox istifadə olunduğu üçün doğulan əkiz və üçəmlərin, hətta dördəmlərin sayında nəzərəçarpacaq artım var. Təxminən 30 il öncəyə qədər, yəni Azərbaycan Sovet İttifaqının tərkibində olarkən çox nadir hallarda dünyaya gələn üçüəm uşaqların ailələrinə dövlət xüsusi qayğı göstərirdi. Belə ki, üçəmlərin ailələrinə ev verilər, anaya xüsusi yardımçı ayrılar, ailəyə müəyyən müavinətlər, hətta inək verərdilər. Bəs indi vəziyyət necədir? Bu müavinətlərin verilməsi davam edirmi? Məsələylə əlaqədar Əmək və Əhalinin Sosial Müdafiəsi Nazirliyinin mətbuat xidmətinin rəhbəri Fazil Talıblıya sual ünvanladıq. Fazil Talıblı bildirdi ki, indiki qanunvericilikdə üçəm uşaqların doğulmasına görə hər hansı özəl müavinətlərdən söhbət açılmır. Yeni qanunvericiliyə əsasən anadan olan hər uşağa görə 200 manat məbləğində birdəfəlik müavinət nəzərdə tutulub.

Bir zamanlar ailədəki hər uşağın sayına görə verilən və uşaq müəyyən yaşa çatdıqdan sonra kəsilən uşaq pulu məsəsləsi isə Milli Məclisin deputatları tərəfindən bir neçə dəfə səsləndirilsə də hələlik qanun şəklində öz əksini tapmayıb.

Ailə, Qadın və Uşaq Problemləri üzrə Dövlət Komitəsindən isə bildirildi ki, hazırda qanunvericilikdə belə hal nəzərdə tutulmayıb. Lakin ehtiyacı olan ailələr komitəyə müraciət edəndə komitə öz tərəfindən yeni doğulmuş körpələrə yardım məqsədi ilə bir neçə ay ərzində uşaq bezləri, uşaq qidaları ilə təmin edir.

Evlə təmin olunan nadir ailələr isə (söhbət üçəm doğulan ailələrdən gedir) ya dövlət başçısına və ya hansısa nazirliyə xüsusi müraciət əsasında ev ala bilirlər.