Yaş üstünə yaş gəlincə
Yaşamaq, nəfəs almaq, ömür pəncərəsindən həyatın qaranlıq labirintinə baxmaq, bir hovur dincini alıb irəliyə addımlamaq gözəldir. Fikirləşirəm ki, yaş üstünə gələn yaş, ömrün bir pilləsinin də artması insanın dərindən nəfəs alıb, yornuqluğunu dəririb sabaha, gələcəyə, yeni arzulara, kəşf edilməmiş aləmə üz tutmasıdır. Həmişə də üz tutduğumuz yerlərə könüllü gedə bilmirik. Bəzən üzümüzə üz tutub gedirik, bəzən görüşünə getdiyimiz illərin gözünün içinə baxa bilmədiyimizdən gözümüzə eynək qurşayırıq. Hər nə ediriksə özümüzə edirik-pis və yaxşı mənada. İnsan yaxşılıq kimidir, yaxşıların iiçində pardaxlanar, yaşamaq istəyər, qanadlanar... ümid yeri olar.
Omur axıb gedir hədər,
Yarı sevinc, yarı kədər,
Sevinərdin Dunya qədər,
Yaş üstünə yaş gəlincə.
Indi hər şeyi qanırsan,
Sam yandıqca sən yanırsan,
Yaşamaqdan usanırsan,
Yaş üstünə yaş gəlincə.
Gözündə yaş gilələnir,
Sifetine nur çilənir,
Saçlarına qar ələnir,
Yaş üstünə yaş gəlincə.
Fərman qardaş, yaşa, yarat,
Çöhrəndən kədəri sil, at,
Yaşamağın dadın çıxart,
Yaş üstünə yaş gəlincə.
May ayında, daha doğrusu bu ayın ilk günündə, köhnə sovetlər birliyinin vaxtında qeyd etdiyimiz bir gündə dünyaya göz açmış Fərman İdris oğlu Balayev də belə dostlardan biridir. Mənim aləmimdə dost bəzən balaca quşcuğaz, bəzən var olmayan sevgili, bəzən də dibçəkdə çiçəkdir. Amma əsl dost səni səndən çox sevəndir. Əsl dostluq dənizə, ümmana bənzər, daim coşar, çağlayar, insanları fədakarlığa səsləyər. Əsl dost ağır, çətin günlərində bir-birinə dəstək olub, acısına, şirininə də ortaqlaşan, bütöv xarakterli insan olmalıdır. Dost dostun səhvini üzünə deyib, onu doğru yola çəkməlidir. Müsbət xüsusiyyətləri özündə, daxilində cəmləşdirən F.Balayev də bir əmioğlu, dost, yaxın sirdaş kimi yaddaşıma həkk edilib.
Dostluğun qırılmaz zəncirlə müqayisə edilməsi təsadüfi deyildir. Həqiqətən də, səmimi, möhkəm dostluq hisslərini heç nə ilə sarsıtmaq mümkün deyildir. İnsanlar arasında hər xoş münasibəti dostluq adlandırmaq olmaz. Həqiqi dostluq illərin sınağından çıxır, bərkdə-boşda, həyatın enişli-yoxuşlu yollarında sınanılır. Əsl dostluq insanlar arasında münasibətlərin uca zirvəsidir. Əgər sən dostluğu yüksək qiymətləndirirsənsə, gərək dostun sandığın şəxsin yolunda hər bir çətinliyə dözməyi bacarasan, sirlərini ondan gizlətməyəsən, heç vaxt yalan danışmayasan. Nahaq deməyiblər ki, dost-dosta tən gərək, tən olmasa, gen gərək. Dostu olmaq böyük xöşbəxtlikdir.Kimin çox dostu varsa, o, həyatda daha inamlı olur, üzləşdiyi problemləri asanlıqla dəf edir. Adətən, çoxlu dostu olan şəxsi qollu-budaqlı ağaca bənzədirlər. Bu ağac təbiətin şıltaqlıqlarına asanlıqla dözür, onun insanlara daha böyük faydası dəyir. Mən də illərdir Fərmanla dostluq körpüsündən keçirəm. O, sınanılmış bir ziyalıdır. Həm də bizim əməkdaşımızdır. Bu sahədə də özünün bacarığını əsirgəmir.
Bu xoş gündə ona möhkəm cansağlığı, sağlam və bərəkətli ömür, ailə səadəti, övlad sevinci, sağlamlıq və gümrahlıq arzu edirəm. Allah bu xoş münasibəti, dostluq və qohumluq əlaqələrini bizə çox görməsin. Xeyir işlərində can-başla çarpışaq, əlləşək.
Bir daha ad günün mübarək, Fərman əmi oğlu!
“TURAZTV.az” saytının, “Ədalət və həqiqət” qəzetinin yaradıcı kollektivi və dostların adından
Cəmil ZƏBHULLAOĞLU
Son xəbərlər
Ən çox oxunanlar
- Bu gün
- Bu həftə
- Bu ay