Türkiyənin Yalova şəhərində keçən il evinin pəncərəsindən yıxılaraq vəfat edən müğənni Gül Tutun (Güllü) ölümünə dair aparılan istintaq yekunlaşıb.

“Qafqazinfo” xəbər verir ki, bu barədə Türkiyə mətbuatı məlumat yayıb.

Yalova Cümhuriyyət Baş Prokurorluğu tərəfindən hazırlanan ittihamnamədə mərhum müğənninin həbsdə olan qızı Tuğyan Ülkem Gülter barəsində “qabaqcadan planlaşdıraraq öz valideynini qəsdən öldürmə” maddəsi ilə ömürlük azadlıqdan məhrum etmə cəzası tələb olunub.

İttihamnaməyə əsasən, hadisə 26 sentyabr 2025-ci il gecəsi Çınarcıq rayonundakı mənzildə baş verib. Gül Tut qızının otağındakı pəncərədən təxminən 18 metr hündürlükdən beton örtüyün üzərinə düşüb. Məhkəmə tibbi ekspertizası sənətçinin daxili qanaxma nəticəsində həyatını itirdiyini, qanında 3,53 promil spirt olduğunu, lakin zəhərlənmə əlamətlərinin aşkar edilmədiyini bildirib.

İstintaq materiallarında diqqətçəkən məqamlardan biri hadisə gecəsi baş verənlərdir. Məlum olub ki, Tuğyan rəfiqəsi Sultan Nur Uludan anasının çox sevdiyi “Malkata” adlı roman mahnısını səsləndirməsini istəyib. Prokurorluq musiqinin ananı xüsusi olaraq otağa cəlb etmək və qətli həyata keçirmək məqsədilə açıldığı qənaətinə gəlib.

İstanbul Texniki Universitetinin hazırladığı səs ekspertizası rəyində düşmə anından dərhal əvvəl gənc bir qadın səsinin rişxəndli tonda “Görüşərik, bay-bay” dediyi müəyyən edilib. Prokurorluq bu sözlərin Tuğyan tərəfindən deyildiyini, ardından anasını belindən tutaraq pəncərədən aşağı atdığını irəli sürüb.

Qeyd edək ki, hadisənin tək canlı şahidi olan Sultan Nur Ulu əvvəlcə Gül Tutun sərxoş olduğu üçün düşdüyünü desə də, sonradan ifadəsini dəyişərək qızın anasını pəncərədən atdığını etiraf edib. Həmçinin şübhəlinin hadisədən aylar əvvəl rəfiqələrinə “Bir gün anamı pəncərədən atıb öldürəcəyəm” dediyi və telefonunda “Bu qadın ölsün”, “Bezdim anamdan” kimi mesajlar yazdığı ortaya çıxıb. Şübhəlinin telefonunda “Çözülməmiş məhkəmə işləri”, “Seriyalı qatil davası” kimi axtarışlar etdiyi də dosyeyə daxil edilib.

Xatırladaq, qeyd olunan iddialar prokurorluğun ittihamnaməsində yer alıb, Tuğyan Ülkem Gülter haqqında yekun qərarı keçiriləcək məhkəmə prosesinin sonunda hakim verəcək.