Elm və Təhsil Nazirliyi N.Tusi adına Şamaxı Astrofizika Rəsədxanası kosmik hava şəraiti ilə bağlı növbəti proqnozunu açıqlayıb.

Rəsədxanadan Sfera.az-a bildirilib ki, hazırda Günəş fəallığı zəifləyib. Qeyd olunub ki, ən güclü alışma 4491 nömrəli ləkə regionunda qeydə alınan C8.9 sinifli alışma olub. Həmçinin Günəşdə tac kütlə atılmaları müşahidə edilib.

Hazırda Günəşin səthində 3 ləkə qrupunda ümumilikdə 44 ləkə və meridional tac dəliyi müşahidə olunur.

Məlumata görə, C sinifli alışmanın baş vermə ehtimalı 65 faiz, M sinifli alışmanın ehtimalı 15 faiz, X sinifli alışmanın ehtimalı isə cəmi 1 faizdir.

Bundan başqa, enerjisi 2 MeV-dən çox olan elektron selinin orta və yüksək səviyyədə, 10 MeV-dən çox enerjili proton selinin isə fon səviyyəsində olacağı proqnozlaşdırılır.

Rəsədxana bildirir ki, mənfi qütblü tac dəliyi axınlarının təsiri nəticəsində Günəş küləyinin sürəti artacaq. Bunun fonunda iyulun 22-də geomaqnit sahəsinin intensivliyinin G1 səviyyəsinə, yəni zəif geomaqnit qasırğası səviyyəsinə qədər yüksəlməsi ehtimal olunur.