MUSA QƏNİYEV,
Azərbaycan Tibb Universitetinin
Tibb Elmləri Doktoru, Professor

Son dərəcədə ziddiyyətli, gərgin, qorxulu, həyatımıza ölüm saçan müharibələr dövrünə gəlib çıxdıq. Günümüzdə müharibəyə qalxan ölkələrdən biri Bizim tərəfdaşımız, ağır gündə dayaq və arxadaşımız olan, İsrail, digəri isə, ümumi əhalisinin təqribən 42%-ni (40 milyona qədərini) qanı qanımızda, canı canımızdan, dini dinimizdə olan, doğmalarımız- azəri türkləri təşkil edən, İran adlı məmləkətdir.
Bəlkə də dünya güclərinin istək və arzularını dərindən başa düşmədiklərinə görədir ki, sosial şəbəkə aktivistləriləri olan həmvətənlərimizin bir qrupu İsrailin hərəkətlərini alqışlayır, İranı molla rejimi adlandıraraq ünvanına ən arzuolunmaz ifadələr işlədir. Və ya əksinə, İrana qəmxar çıxaraq, İsraili şovinist və təcavüzkar adlandırır.
Əvvəla, müharibələr günahsız insanların ölümünə, şəhər və kəndlərin viran qalmasına səbəb olduğundan, dəhşətli bir faciədir. İkincisi İranın vurulmasına sevinənlər düşünməlidir ki, İranda əsas hədəf nüvə obyektləridir. Bu gün İranda MAQATE- nin təsdiqlədiyi Natans, Fordo, İsfahan, Xondab, Ardalan, Anarsk, eləcə də Tehran reaktoru və Buşer AES kimi nüvə obyektləri vardır. Hətta iddia olunur ki, Təbrizin ərazisində belə gizli nüvə obyekti mövcuddur. Bu nüvə mərkəzlərindən ölkəmizin ərazisinə qədər olan məsafə təqribən 100-700 km-dir. Bir düşünün, hərgah İranda mövcud nüvə reaktorlarından hər hansı biri zədələnərsə, Bizi hansı bəlalar gözləyər. Digər tərəfdən, İranda müharibə nəzarətdən çıxarsa, Bizim qardaş və bacılarımız olan cənubi azərbaycanlıların yeganə ümüd və sığınacaq yeri vətənimiz Azərbaycan olacaqdır. Bu insan axınının qabağında durmaq, onların mövcudluq, yaşam və sosial problemlərini həll etməyin nə demək olduğunu düşünürsüzmi? Nəzərə alın ki, Azərbaycanın ümumi ərazisi cəmi 86600 kvadrat km-dir.
Odur ki, kompyuter arxasında oturub nəsə yazmaq istəyən hər bir kəs, xəyali istəyi yox, reallığı düşünməlidir. Reallıq, hər iki ölkəni sülhə, atəşkəsə səsləmək və bu həssas günlərdə təxribata uymamaqdır.
Əziz həmvətənlərim, Azərbaycan adlı məmləkətimiz çox mürəkkəb və böyük güclərin daima marağında olan bir coğrafi məkandır. Təkcə şimal, cənub və qərb qonşularımızın deyil, dünyanın "Hegemon güclərinin" də Vətənimiz Azərbaycana olan tarixi istək və maraqlarını elə tarix kitablarından oxuya bilərsiz. Sərqimiz isə, Xəzər dənizidir... Yəni nəticə çıxarmaq üçün elə də dərindən düşünməyə ehtiyac belə yoxdur.
Ölkəmizdə bu günki stabillik, sabitlik və təhlükəsizliyin yeganə qarantı ölkə başçısıdır. Bu gün vətənin, millətin və dövlətin sevən hər bir kəs, bu böyük insanın ətrafında daha sıx birləşib, mövcud sabitlik və stabilliyi qorumağa borcludur. Digər tərəfdən, Ölkə başçısının etimad göstərib, vəzifəyə təyin etdiyi vəzifə sahibləri qohumbazlıq və yerlibazlıqdan əl çəkməli, vətənin, millətin və dövlətin sevən insanları kənarlaşdırıb, yaxın bildiklərini vəzifəyə gətirməməlidir, tayfabazlığa son qoyulmalıdır. Çünki bədbəxtlik, faciə və ölüm sərhəd tanımır. Bu halda qurtuluşun yeganə yolu, zamanın düzgün qiymətləndirilməsinin meyarı olan, bacarıq, ağıl və güzgün idarəçilikdir. Vətənə, millətə və ölkə başçısına sədaqətdir.
Ulu Tanrı müstəqilliyimizi, Dövlətimizi və Dövlətçiliyimizi qorusun.