"Qobustan" kitabının müəllifi,Azərbaycan folklorşünası, filologiya elmləri doktoru, professor Seyfəddin Qəniyev 71 yaşında vəfat edib.
Seyfəddin Qəniyev 28 mart 1952-ci ildə Şamaxı rayonunun Dağ Kolanı kəndində anadan olub. Poladlı kənd 8 illik və Nərimankənd orta məktəbini tərifnamə ilə, Azərbaycan Dövlət Pedaqoji İnstitutunun (indiki Azərbaycan Dövlət Pedaqoji Universiteti) Filologiya fakültəsini fərqlənmə diplomu ilə bitirib.
Həmin institutun aspiranturasında təhsil alıb. Şamaxı rayonunun Göylər kənd səkkizillik məktəbində müəllim işləyib. İşlədiyi müddətdə "Metodist müəllim", SSRİ Maarif əlaçısı adlarına layiq görülüb. "M.F.Axundovun "Kəmalüddövlə məktubları" əsərinin bədii metod və janr xüsusiyyətləri" mövzusunda namizədlik, "Azərbaycan folklorunun regional özunəməxsusluğu - Şirvan folklor mühiti" mövzusunda isə doktorluq dissertasiyası müdafiə edib. 60 kitab (monoqrafiya toplu, metodik tövsiyə), 120-dən çox tezis və məqalənin müəllifidir. AMEA Folklor İnstitunda fəaliyyət göstərən müdafiə şurasının üzvü idi. ADPU Şamaxı filialı direktorunun tədris və elmi işlər üzrə müavini vəzifəsində çalışıb.
Azərbaycan Yazıçılar Birliyi (AYB) və Azərbaycan Aşıqlar Birliyinin üzvü idi. Bir müddət AYB-nin Şamaxı filialına rəhbərlik edib. Beytüs-səfa məclisini təşkil edib. ADPU-nin Şamaxı filialında kafedra müdiri vəzifəsində işləyib. 2009-cu ildə "Tərəqqi medalı" ilə təltif olunub. Şirvan folklorunun tədqiqində, bu bölgədə yaşayıb yaratmış görkəmli insanların, sənətkarların həyat, fəaliyyət və yaradıcılığının öyrənilməsinə xüsusi əmək sərf eləmiş Seyfəddin Qəniyevə Allahdan rəhmət diləyirik!