"ŞƏHİD ANASININ AD GÜNÜ OLMUR" - FOTOLAR

Xəbərlər

22.05.2025, 22:22

"ŞƏHİD ANASININ AD GÜNÜ OLMUR" - FOTOLAR

"ŞƏHİD ANASININ AD GÜNÜ OLMUR"

Bu gün ad günü olan Vətən müharibəsinin şəhidi ölməz Elçin Həsənlinin anası Xatirə xanımın timsalında bütün şəhid analarının dilindən

Təbrik eyləməyin məni,a dostlar,
Şəhid anasının ad günü olmur.
Mənimçün bu gündən ağır günmü var?!
Şəhid anasının ad günü olmur.

Şəhid anasının dərdi var böyük,
Çiynində həm ağır, həm şərəfli yük.
Məğrur dayansa da o,-boynu bükük,
Şəhid anasının ad günü olmur.

Şəhid anasının qəlb yaxır sözü,
Yollardan yığılmır intizar gözü.
Oğulsuz bir canlı şəhiddir özü,
Şəhid anasının ad günü olmur.

Şəhid anaları istər ki,tək -tək,
Pozanla səhvini silən uşaqtək,
Təqvimdən ad günün bir siləydi tək,
Şəhid anasının ad günü olmur.

Əldə bəy xonçası bağlı qalıbdır,
Övlad dərdi onu xəstə salıbdır.
Ən ali zirvəyə tez ucalıbdır,
Şəhid anasının ad günü olmur.

Oğulsuz hər günü o, haram sayır,
Həyatı yarımçıq, qəlb param sayır.
Şəhidlik ən ali bir məram,sayır,
Şəhid anasının ad günü olmur.

Ən adi günlərdən ağırdır o gün,
Dözümlü hər ana fağırdır o gün.
Bala dağlı ürək yağırdır o gün,
Şəhid anasının ad günü olmur.

24.05.2024 V gün 02:40 TƏRANƏ MƏFTUN