“Sığortalamadığınız daşınmaz əmlakınız yanarsa, həmin əmlakınızın dəyərinin 20 faizə qədərinədək dövlətdən kompensasiya ala bilərsiniz”.

Bizimyol.info xəbər verir ki, bu barədə sığorta məsələləri üzrə ekspert İlkin İbrahimov bildirib.

Ekspert deyib ki, “İcbari sığortalar haqqında” qanuna görə hər bir əmlak mütləq şəkildə sığortalanmalıdır: “Sığorta etməyən vəzifəli şəxs 80 manat məbləğində cərimələnir, fiziki şəxs öz evini sığortalamırsa 30 manat cərimələnir. Hüquqi şəxs öz əmlakını sığortalamırsa 200 manat cərimələnir. Və dövlət də burada hansı sığortasız ev varsa və sığorta hadisəsi baş verirsə bu zaman həmin əmlakları Fövqəladə komissiyanın qərarı ilə qiymətləndirmə keçirilir və qərar qəbul edilə bilər ki, dəymiş zərərin 20 faizə qədərinədək dövlət kompensasiya verə bilər”.

Ekspertin sözlərinə görə, icbarilik anlayışının ümumi mahiyyəti budur ki, kənarda heç bir sığortalanmamış daşınmaz əmlak qalmamalıdır: “Qalırsa demək kimsə cəzalanmalıdır. Fərqi yoxdur ya vəzifəli şəxs ya əmlak sahibi. Əgər gözdən qaçmış sığortalanmamış ev qalırsa bu zaman dəyən ziyanın 20 faizə qədərini dövlət qarşılaya bilər. Lakin bu tələb praktikada həyata keçirilmir. Mexanizm və tətbiq hələki açıq qalır”.

Qeyd edək ki, İcbari sığortalar haqqında” qanunun 41.2-ci maddəsinə əsasən şəxs mülkiyyətində və (və ya) sahibliyində olan bu Qanunun 35.2-ci maddəsində nəzərdə tutulmuş hər hansı əmlakını sığorta etdirmək vəzifəsini yerinə yetirmədikdə, həmin əmlaka dəymiş zərərə görə dövlət vəsaiti hesabına kompensasiya verilməsi barədə səlahiyyətli dövlət orqanları tərəfindən müvafiq qərar verildiyi halda, ödənilə biləcək belə kompensasiyanın məbləği zərər məbləğinin 20 faizdən artıq ola bilməz.