Şamaxıda rayon icra hakimiyyətinin və AMEA-nın N.Tusi adına Şamaxı Astrofizika Rəsədxanasının birgə təşkilatçılığı ilə 15 İyun - Milli Qurtuluş Gününə həsr olunan tədbir keçirilib. Tədbirdə rayon icra hakimiyyətinin başçısı Tahir Məmmədov, Milli Məclisin deputatı Naqif Həmzəyev, Şamaxı Astrofizika Rəsədxanasının icraçı direktoru Nəriman İsmayılov, AMEA Mərkəzi Elmi Kitabxanasının baş direktoru Məmməd Əliyev, YAP Şamaxı rayon təşkilatının sədri Tural Qasımlı, YAP Yasamal rayon təşkilatının sədri Bəxtiyar Nəbiyev, rayon ictimaiyyətinin nümayəndələri iştirak ediblər.

AZƏRTAC-ın bölgə müxbiri xəbər verir ki, tədbiri açan Rəsədxananın icraçı direktoru Nəriman İsmayılov Milli Qurtuluş Gününün Azərbaycanın dövlətçilik tarixində əhəmiyyəti barədə məruzə ilə çıxış edib.

İcra başçısı Tahir Məmmədov çıxışında müasir Azərbaycan tarixinə qızıl hərflərlə yazılmış 15 İyun - Milli Qurtuluş Gününün müstəqillik tariximizin ən şərəfli səhifələrindən biri olduğunu söyləyib. Qeyd edib ki, həmin tarixdən sonra Azərbaycan sürətli iqtisadi inkişaf yoluna qədəm qoydu, dünya birliyinə inteqrasiya olundu, beynəlxalq aləmdə layiqli yer tutdu. Ulu Öndərin siyasətinin uğurla davam etdirilməsi nəticəsində Azərbaycan 30 illik işğala son qoydu, Vətən müharibəsində şanlı Zəfər qazandı.

Milli Məclisin deputatı Naqif Həmzəyev, professor Məmməd Əliyev, YAP Şamaxı və Yasamal rayon təşkilatlarının sədrləri Tural Qasımlı, Bəxtiyar Nəbiyev və başqaları çıxışlarında Vətənin dar günündə ictimaiyyətin, ziyalıların xahişi ilə Bakıya gələn ulu öndər Heydər Əliyevin uğurlu siyasi fəaliyyətindən danışıb, onun hakimiyyətə qayıdışının dövlətimizin xilası üçün müstəsna əhəmiyyət daşıdığını vurğulayıblar.

Tədbirdə AMEA Mərkəzi Elmi Kitabxanası tərəfindən ümummilli lider Heydər Əliyevin xilaskarlıq missiyası ilə bağlı hazırlanmış videoçarx nümayiş olunub.