Şamaxı rayon Mədəniyyət Mərkəzində şəhid ailələrinin iştirakı ilə 8 Mart - Beynəlxalq Qadınlar Günü münasibətilə tədbir keçirilib. Tədbirdə rayon icra hakimiyyətinin başçısı Tahir Məmmədov, Milli Məclisin deputatı Tamam Cəfərova, şəhid ailələri və rayon ictimaiyyətinin nümayəndələri iştirak ediblər.

AZƏRTAC-ın bölgə müxbiri xəbər verir ki, tədbirdə çıxış edən rayon icra başçısı Tahir Məmmədov tarixi Qələbə ilə başa çatan 44 günlük Vətən müharibəsində xüsusi qəhrəmanlıq göstərərək şəhidlik zirvəsinə ucalan oğulların əziz xatirəsini yad edib, onların torpaqlarımızın bütövlüyü uğurundakı qəhrəmanlıqlarından danışıb. İcra başçısı, habelə Prezident İlham Əliyevin və Birinci vitse-prezident Mehriban Əliyevanın şəhid ailələrinə göstərdikləri diqqət və qayğıdan geniş söhbət açıb, şəhid analarını 8 Mart - Beynəlxalq Qadınlar Günü münasibətilə təbrik edib.

Milli Məclisin deputatı Tamam Cəfərova tədbirdə çıxış edərək, xalqımızın vətənsevər, igid övladlar yetişdirən analarla fəxr etdiyini bildirib, Beynəlxalq Qadınlar Günü münasibətilə onlara təbrikini ünvanlayıb.

Tədbirdə çıxış edən YAP Şamaxı rayon təşkilatının sədri Tural Qasımlı, ADPU-nun Şamaxı filialının direktoru Tünzalə Yusifova, şəhid anası Güllü Babaşova ölkəmizin ərazi bütövlüyü uğrunda canlarından keçmiş şəhidlərimizin əziz xatirəsinə hörmət və ehtiramlarını ifadə ediblər.

Sonda şəhid ailələrinə çiçək dəstələri və hədiyyələr təqdim olunub. Turaztv.az