Bakıda bədii gimnastika üzrə FIG dünya kubokunda idmançılar üçün gözəl şərait yaradılıb.

Bunu AZƏRTAC-a açıqlamasında İsrail gimnastı Darya Atamanov deyib.

"Təsnifat mərhələsində dörd alətlə çıxışılarımı qiymətləndirsək, deyə bilərəm ki, hər şey hamar olmadı. Hər bir alətdə səhvlər oldu. Amma işimi davam etdirib, irəliyə addımlayacağam. Kubokun finalında məqsədim proqramı maksimum yerinə yetirməkdir. İstərdim ki, həm məşqçi, həm də özüm məmnun qalaq", - deyə gimnast bildirib.

İsrail təmsilçisi qeyd edib ki, Milli Gimnastika Arenasında çıxış etmək çox rahatdır: "Yarışlarda mühit mükəmməldir. Zal böyükdür, işləmək üçün gözəl şərait var. Bu cür qəbula görə Azərbaycana təşəkkür edirəm".

Qeyd edək ki, aprelin 22-dən 24-dək Bakıda Bədii Gimnastika üzrə dünya kuboku keçirilir.

Azərbaycanın gimnastika növləri üzrə bu il ev sahibliyi etdiyi 5-ci beynəlxalq yarışda 31 ölkədən 42-si fərdi və 84-ü qrup komandasının (14 qrup) üzvü olmaqla 126 gimnast iştirak edir.

Yarışda ölkəmizi fərdi növdə Arzu Cəlilova və Zöhrə Ağamirova, eləcə də Güllü Ağalarzadə, Ləman Əlimuradova, Kamilla Əliyeva, Zeynəb Hümmətova, Yelizaveta Luzan, Darya Sorokinadan ibarət qrup hərəkətləri üzrə komanda təmsil edir.

3 gün ərzində gimnastlar ayrı-ayrı alətlər və çoxnövçülük üzrə mübarizə aparacaqlar.

Ənənəyə uyğun olaraq, bu kubokda da ən çox icra xalını yığmış gimnast və qrup komandasına ənənəvi “AGF Trophy” Kuboku da təqdim olunacaq.

Qeyd edək ki, bu, ölkəmizdə keçirilən bədii gimnastika üzrə 9-cu dünya kuboku yarışıdır. Xatırladaq ki, paytaxtımız 2005 və 2019-cu illərdə bu növ üzrə dünya çempionatına və 8 dünya kubokuna ev sahibliyi edib.