Əmlak Məsələləri Dövlət Xidməti daşınmaz əmlakın qeydiyyatı ilə bağlı göstərilən xidmətlərdə operativliyə, şəffaflığa, vətəndaş məmnunluğuna xüsusi önəm verir. Bu sahədə tətbiq edilən yeniliklər, prosedurların sadələşdirilməsi daşınmaz əmlakın qeydiyyatının daha da aktivləşməsi üçün əlavə imkan yaradır. Belə ki, yanvar-mart ayları ərzində 73 min 346 daşınmaz əmlak üzərində mülkiyyət hüququnun qeydiyyatı aparılıb.

Xidmətdən AZƏRTAC-a bildirilib ki, bu, ötən ilin ilk rübü ilə müqayisədə 8,2 faiz çoxdur. Rüblük göstəricinin 17 min 979-u (24,5 faizi) ilkin, 55 min 367-si (75,5 faizi) isə təkrar qeydiyyatın payına düşür.

Mülkiyyət hüquqlarının qeydiyyatı aparılan əmlaklardan 10 min 837-si fərdi yaşayış və bağ evi, 19 min 253-ü mənzil, 40 min 572-si torpaq sahəsi, 832-si qeyri-yaşayış binası, 1649-u qeyri-yaşayış sahəsi, 190-ı əmlak kompleksi, 13-ü isə çoxmərtəbəli yaşayış binasıdır.

Qeyd edək ki, bu dövrdə dövlət qeydiyyatına alınan daşınmaz əmlakların 19 min 776-sı Bakı şəhərində, qalanları isə bölgələrdə yerləşir.