AXRINA ÇIXAR

Sabahın gözünə baxmağın üçün,
Allahın qoyduğu haqq yolun keçin,
Mərdin əlindən zəhərdə için,
Namərd pusqu qurub gözünə baxar,
Elə gülə-gülə axrına çıxar.

Dostu biz seçsək də, zaman süzəcək,
Elə ağrılar var şərlə üzəcək,
Yalanlar yaxaraq sıra düzəcək,
Səni tora salıb suvayıb yaxar,
Elə gülə-gülə axrına çıxar.

Elə sifət gördüm cəhənnəm təki,
Hər yola əl atıb edəcək ərki,
Demək şeytan imiş onun şəriki,
Söyüd budağı tək, hər yana axar,
Elə gülə-gülə axrına çıxar.

Şəninə təriflə deyilən sözü,
Uddu əjdaha tək bir anlıq özü,
Elə bil izləyir ovunu gözü,
Samanın altında lal su tək axar,
Elə gülə-gülə axrına çıxar.

Şəhla, Allah insana veribdir səbir,
Sənə qıcıq verən olsa hərdən bir,
Yenə dişini sıx de ki, ya səbir,
Şeytan min donda qarşına çıxar,
Elə gülə-gülə axrına çıxar.

Şəhla Xəlilqızı.