ZİRVƏDƏN ENƏN DEYİL - Solmaz ŞİRVANLI

Xəbərlər

6.04.2022, 21:19

ZİRVƏDƏN ENƏN DEYİL - Solmaz ŞİRVANLI

ZİRVƏDƏN ENƏN DEYİL
Gözüm qalıb yollarda,
Bax gəlməyir yar hələ.
Carpazlanıb qollar da,
Dönüb canlı heykələ.

Yar sənin həsrətinlə,
Ötdü günüm,rüzgarım,
Kül oldum xiffətinlə,
Artdı qəmim-qübarım.

Söylə görüm gəlişin,
Bəs niyə uzaq oldu,
Yollar qasırğa-tufan,
Ya da ki, buzaq oldu?

Gözləyirəm hələ yar,
Gözüm -könlüm intizar,
Həsrətindən kül oldum,
Qalmışam,xəstə-bimar.

Yazıram həsrətinlə,
Ey könlüm pərvanəsi,
Gözlərimdə iz salıb,
Ayrılığ nişanəsi.

Yarı xəstə eyləyən,
Bil sənin həsrətindir,
Məni pərişan edən,
Çəkdiyim xiffətindir.

De nə qədər gözləyim,
Ömür başa yetir gəl,
Aman vermir heç kəsə,
Gələndə zalım əcəl.

Gəldi ömrün payızı,
Əsir acı ruzigar,
Yetişib ömrün qışı,
Bəlkə çatıb son bahar.

Edir öz bildiyini,
Aman verməyir fələk,
Alır canı yarıda,
Bəxtə əsdirir külək.

Ömür ötür,can gedir,
Xəyal burulğanında,
Könül yarın istəyir,
Hər dəm görə yanında.

Qayıtmaq istəsən də,
Geriyə dönmək olmur,
Ürək qəmdən alışsa,
Söz deyib,dinmək olmur.

Susub dinmir ruhum da,
Simi qırıq saz kimi,
İsinmir dəli könlüm,
Bahar kimi,yaz kimi.

Xəyal apardı məni,
Ömrün bahar çağına,
Döndüm budaqda əsən,
Son xəzan yarpağına.

Təkcə sənin esqindir,
Yaşadan hələ məni,
Eşqin eyləyib gülüm,
Özünə kölə məni.

Sevgin ilə yazıram,
Hələ şirin nəğmələr,
Vusalına yetincə,
Hələ yazacam nələr!

Ötdü sənsiz ömürdən,
Neçə payız,necə qış,
Fəraqından don geydim,
Yaxasında min naxış.

Gəl ömrün payızında,
Tutaq gülüm əl-ələ,
Sevək gənclər kimi biz,
Sevgimiz çıxsın zilə.

Gəzək laləli düzdə,
Toplayaq çiçəkləri,
Səp başıma şabaş tək,
Al-əlvan ləçəkləri.

Sənin xəyalın ilə,
Dolanıram zirvədə,
Sanki dünya mənimdir,
Gözüm yoxdur heç nədə.

Sən mənim ruhumdasan,
Canımdasan hər zaman,
Səninlə dünya mənim,
Sənsiz ömrüm cən-duman.

Solmaz sözünə sadiq,
Eşqindən dönən deyil,
Xəyalı göylərdədir,
Zirvədən enən deyil!

Solmaz Şirvanlı {AYNAZ CƏVAHİR KƏLAM}
06-04-2022