Azərbaycan Dövlət Pedaqoji Universitetinin (ADPU) Şamaxı filialında 14 mart - Beynəlxalq Riyaziyyat Gününə həsr olunan “Riyaziyyat bütün elmlərin açarıdır” adlı elmi-praktik konfrans keçirilib.

AZƏRTAC-ın bölgə müxbiri xəbər verir ki, filialın akt zalında təşkil olunan elmi-praktik konfransı açan ADPU-nun Şamaxı filialının direktoru, dosent Tünzalə Yusifova riyaziyyat elminin müasir dünyamızda və həyatımızda xüsusi əhəmiyyətini qeyd edib. Vurğulayıb ki, UNESCO Baş Assambleyasının 2019-cu ilin noyabr ayının 26-da Parisdə keçirilən 40-cı sessiyasında hər il martın 14-də Beynəlxalq Riyaziyyat Gününün qeyd edilməsi barədə qərar qəbul olunub.

Tədbirdə filialın riyaziyyat və kompüter elmləri kafedrasının baş müəllimi Çingiz Dadaşov “Dünya riyaziyyat dilində yazılmış əzəmətli bir kitabdır” adlı məruzə ilə çıxış edib. Məruzəçi riyaziyyat elminin dərinliklərindən ətraflı danışıb. Sonra Misir Mərdanovun “Azərbaycan riyaziyyatçıları” kitabını universitetin kitabxanasına hədiyyə edib.

Daha sonra tədbirdə filialın məzunu Güldəstə Nəsiblinin “Maraqlı ədədlər”, tələbələr Jalə Tarverdiyevanın “Riyaziyyat elmi haqqında aforizmlər”, Dilşad Dadaşovanın “Riyaziyyatın digər fənlərlə əlaqəsi”, Mehran Hidayətlinin “Maraqlı riyazi kəşflər”, Lamiyə Həmidovanın “Nanotexnologiyalar və onların Azərbaycanda tətbiq sahələri” mövzularında bir-birindən maraqlı tədqiqat işləri təqdim olunub.