Avqustun 26-da Laçına səfər edən rayon sakinləri illər sonra doğma Qorçu kəndində olublar.

Turaztv.az AZƏRTAC-a istinadən xəbər verir ki, jurnalistlərlə birlikdə kəndi gəzən sakinlər burada bir orta məktəbin, mədəniyyət evi, poçt və 2 kitabxananın fəaliyyət göstərdiyini deyiblər.

Daha sonra laçınlılara Qorçu kəndinin ərazisində inşa ediləcək hava limanı haqqında məlumatlar verilib. Qeyd olunub ki, aeroportun tikilməsi ümumilikdə bölgənin sosial-iqtisadi inkişafına təkan verəcək, turizm potensialının artırılmasına səbəb olacaq. Laçın hava limanının inşası həm də işğaldan azad edilmiş tarixi torpaqlarımızda aparılan abadlıq-quruculuq işlərinin miqyasını göstərir. Olduqca mühüm strateji əhəmiyyətə malik olan Laçın aeroportu logistik mərkəzlərin yaradılmasına da töhfə verəcək. Laçın hava limanı Azərbaycanın dəniz səviyyəsindən ən hündürdə yerləşən aeroportu olacaq. Uçuş-enmə zolağının uzunluğu 3 kilometr olacaq hava limanında 6 təyyarə dayanacağının inşası nəzərdə tutulur. Bu hava limanı Kəlbəcər rayonu ərazisinə hava nəqliyyatı ilə gediş-gəlişi asanlaşdıracaq.