Xəbərlər
25.08.2026, 21:52
Abbas Əli oğlu Bağırovun 55 illik yubileyidir
Bu gün, 25 avqust 2026-cı il Azərbaycan səhiyyəsinə, elminə, ədəbiyyatına və xüsusilə Dədə Ələsgər irsinin öyrənilməsi və təbliğinə öz töhfələrini verən, tibb üzrə fəlsəfə doktoru, publisist, Ələsgərşünas, Dədə Ələsgər İrsinin Tədqiqi və Təbliği Mərkəzinin direktoru, Birinci Qarabağ müharibəsi veteranı Abbas Əli oğlu Bağırovun 55 illik yubileyidir.
Dədə Ələsgər Ocağı İctimai Birliyi olaraq bu əlamətdar gün münasibətilə Abbas Bağırovu səmimi-qəlbdən təbrik edir, ona möhkəm cansağlığı, uzun ömür, ailə səadəti və bütün fəaliyyətində yeni uğurlar arzulayırıq!
Abbas Bağırov ömrünü yalnız həkimlik sənətinə deyil, həm də elmə, milli-mənəvi dəyərlərə və Azərbaycan ədəbiyyatının, aşıq sənətinin zəngin irsinin araşdırılmasına həsr edən ziyalılardandır. Tibb sahəsindəki elmi fəaliyyəti nəticəsində tibb üzrə fəlsəfə doktoru elmi dərəcəsi alması, çoxsaylı elmi əsərləri və kitabları onun elmə bağlılığının göstəricisidir.
Onun fəaliyyətinin mühüm istiqamətlərindən biri də Göyçə ozan-aşıq mühitinin, Aşıq Ələsgərin və digər görkəmli aşıq-şairlərin yaradıcılığının araşdırılması və təbliğidir. Dədə Ələsgər irsinin tədqiqinə yeni yanaşmaları, bu istiqamətdə apardığı araşdırmalar və ictimai-mədəni fəaliyyətləri xüsusi əhəmiyyət daşıyır.
Abbas Bağırovun 2025-ci ildə işıq üzü görən “Nərimanlı-Hüseynquluağalı aşıqları və şairləri” kitabı da doğma Göyçə mühitinin zəngin ədəbi-aşıq irsinin gələcək nəsillərə çatdırılması baxımından dəyərli tədqiqat nümunələrindəndir.
Birinci Qarabağ müharibəsində həkim kimi yaralı döyüşçülərə döyüş meydanında tibbi yardım göstərməsi, onların təxliyəsinin və hospitalizasiyasının təşkilində iştirakı onun peşə borcuna və Vətənə bağlılığının parlaq nümunəsidir. Abbas Bağırov həkimlik, elm, ədəbiyyat, aşıq sənəti və vətəndaşlıq mövqeyini özündə birləşdirən ziyalıdır.
Hörmətli Abbas müəllim!
Sizi 55 illik yubileyiniz münasibətilə bir daha ürəkdən təbrik edir, qarşıdakı illərdə də elmi və ədəbi yaradıcılığınızın, Dədə Ələsgər irsinin araşdırılması və təbliği istiqamətində fəaliyyətinizin daha böyük uğurlarla davam etməsini arzulayırıq.
Dədə Ələsgər Ocağı İctimai Birliyi
Son xəbərlər
Ən çox oxunanlar
- Bu gün
- Bu həftə
- Bu ay
