Xəbərlər
29.03.2026, 01:18
TƏRANƏ MƏFTUN : DEYƏSƏN BULUDUN "QƏLBİ" DOLUDUR - FOTO
Yağır neçə gündür, hey dayanmadan.
Ya da bu intiqam, cəza yoludur,
Yağır yorulmadan, hey usanmadan?
Çox güman göylər də gəlibdir cana,
Səmaya nə qədər raket atarlar?
Bu qədər qan töküb qıyanlar cana,
Qorxmur ki, tökülən qanda batarlar?
Açılan silahlar hər gün can alır,
Batan günəş kimi həyatlar sönür.
Buxarla birlikdə ahlar ucalır,
Göydə qatarlaşan buluda dönür.
Cinayət, haqsızlıq, iftira, nifrin...
Yatmış vicdanların çoxalır sayı.
Bəlkə yumaq üçün bağrını yerin,
Buludun torpağa budur harayı?
Yer göyə əl açır, imdad istəyir,
Səmanın özü də bağrı yaradır.
Onların xətrinə insan pis dəyir,
Təbiət önündə üzü qaradır.
Qana susayanlar, əli qanlılar,
Yerlə göy arası itirib başı.
Arada güdaza gedir canlılar,
Yanğın, fəlakət var hər addımbaşı.
Halalı sevənlər acından ölür,
Haram aşiqləri kef damaqdadır.
Kasıb bir tikəsin beş yerə bölür,
Doymadan sadəcə o dadmaqdadır.
"Dünya, dağılasan" deyib hay çəkən,
Duan qəbul oldu, dağılır daha.
Özünə günahdan hər gün "pay çəkən",
Salamat çıxarmı görən sabaha?
Tökür göz yaşını doyaraq cana,
Ürəkdən ağlayır bəlkə buludlar?
Etiraz eyləyib yer, göy insana,
Edir gen dünyanı başlarına dar?
Qiymətli, qiymətsiz neçə maşın var,
Avarsız qayıqtək sularda "üzür".
Ağac var kökündən qoparır sular,
Torpaqdan ayrılıb sel-suda "süzür".
Ovulub tökülür torpaq sel, sudan,
Quru yer qalmayır ayaq basmağa.
Gur selə qərq olub hər yan, ey insan,
Səy göstər günahdan uzaqlaşmağa.
29.03.2026 00:50 VIIgün
Son xəbərlər
Ən çox oxunanlar
- Bu gün
- Bu həftə
- Bu ay
