Albaniyanın Baş naziri Edi Rama NATO-nun Türkiyəyə doğru yönəlmiş daha bir İran ballistik raketini vurduğunu açıqlamasına münasibət bildirib.

"Unikal" xəbər verir ki, bu barədə baş nazir "X" sosial şəbəkəsində yazıb.

E.Rama bildirib ki, Albaniya ikinci belə hücumu qətiyyətlə pisləyir və bunun narahatedici bir hərəkət olduğunu bildirib.

Hökumət başçısı vurğulayıb ki, Albaniya NATO-nun təhlükəsizliyini və birliyini qorumaqda Türkiyəni və bütün müttəfiqlərini qətiyyətlə dəstəkləyir.

"Albaniya İran rejiminin Türkiyəyə raket zərbəsini qətiyyətlə pisləyir. Bunun son günlərdə ikinci belə zərbə olması dərin narahatlıq doğurur və bu hərəkətlərin aqressiv və qeyri-sabitlik yaradan mahiyyətini daha da vurğulayır. Türkiyə Albaniyanın dostu və strateji tərəfdaşı olmaqla yanaşı, dəyərli NATO müttəfiqidir. İran rejiminin qonşularına amansız hücumlar yolu ilə gərginlik və qeyri-sabitlik yaratmaq cəhdləri son dərəcə təhlükəlidir.

Albaniya NATO-nun Alyans ərazisini, hava məkanını və vətəndaşlarını qorumaqdakı çevik hərəkətlərini təqdir edir. Albaniya Türkiyəni və bütün müttəfiqləri Alyansımızın təhlükəsizliyini və birliyini qorumaqda qətiyyətlə dəstəkləyir", - deyə paylaşımda bildirilib.