QIZIL QAYANIN XİLASKARI - FOTO

Xəbərlər

20.01.2026, 00:03

QIZIL QAYANIN XİLASKARI - FOTO

ƏZİZƏ AĞAHÜSEYNQIZI

Torpaqlarımızın ərazi bütovlüyü uğrunda Füzuli, Xocavənd istiqamətində Qızılqaya yüksəkliyininin alınmasında şəhid olan, baş leytenant Süleymanlı Kənan Sadıq oğlunun əziz xatirəsinə...

Qanında dövr etdi intiqam hissi,
Silaha sarılıb cəbhəyə getdin.
Xoşuna gəlirdi əsgər libası,
Geyindin əyninə kamına yetdin.

Həvəslə döyüşə atıldın oğul,
And içdin üçrəngli al bayrağıma.
Dedin qurtaracam dardan, çətindən,
Yetəcəm yurdumun zəfər çağına.

Döyüs yollarına dikildi gözlər,
Anan Səadətin gözü yoldadır.
Ötmür, daşa dönüb zaman da burda,
Dayanıb, həyat da elə qəm dadır.

Xocavənd, Füzuli döyüş yolların,
Keçib Ağtəpəni, düzü dolanım.
Düsmən tapdağında, o Üçtəpədə,
Dostunu qurtarıb şəhid olanım.

Ön xəttdə sərasər yuxu bilmədən,
Səngərdə aslana dönən əsgərim!
Qələbə anına üç saat qalmış,
Vətən, Vətən! deyib sönən əsgərim!

44 günlük Vətən savaşında sən,
Sonsuz xaruqələr yaratdın, qurdun.
Aldın yağılardan Qızıl qayanı,
Düsmənin önündə qürurla durdun.

Ötür ildırımtək savaş günləri,
Ağtəpə, Xocavənd yolları buzdu.
Silaha sarılan igid oğullar,
Qələbə əzmiylə döyüsdü, dözdü.

İllərlə gözlənən zəfər günündə,
O qara xəbəri aldı Vətənim.
Əlləri qoynunda, gözləri yolda,
Qəmli xəyallara daldı Vətənim.

Sənsən zirvələrə bayraq olanım,
Arzusu qönçətək solan Kənanım.
Gözləri bir anda ana axtaran,
Payız buludutək dolan Kənanım.

Həsrətlə gözlənən zəfər gününü,
Yaşatdın xalqına, elinə, Kənan!
Səni bayrağına bürüyən xalqın,
Düşmüsən zəfərtək dilinə, Kənan!

05.01.2026

ŞƏHİDLƏR XİYABANI

Yavaş keçin siz allah,
Burda şəhid uyuyur.
Olsa da məzar altda,
Ruhu bizi qoruyur.
Burda şəhid uyuyur.

30 ildir sərasər,
Sinəmə sipər olan
Ana Vətən dağından,
Keçib cavanlığından,
Keçib şirin canından,
Burda şəhid uyuyur.

Mərmiyə sinə gərdi,
Atəşi susdurdu o.
Yatmadı sübhə kimi,
Millətinin, yurdunun.
Azad sabahı üçün,
Qəhrəmantək durdu o.

Şəhidlər xiyabanı,
Səni necə sevməyim ?
Axı sənin qoynunda,
Cəsur Kamandar yatır!
Alı, Çingiz, Salatın,
Elçin, Məhəbbət, Ülvi,
Larisa, İlqar yatır!
Dilimin bayatısı,
Şeiri, amandır yatır!

Şəhidlər xiyabanı,
Könlümün qübar yeri.
Millətimin and yeri,
Məzarların üstündə.
Qan ürəkli qərənfil,
Sevgimin nübar yeri.
Səhər günəşlə durub,
Axşam qüruba dönən.

Şəhid analarının
Xəyalıyam, sözüyəm.
Şeirimlə, nəğməmlə,
Mən şəhidin özüyəm,
Mən şəhidin özüyəm.

AĞLAYIR

Yenə ruhum geyib qəm libasını,
Dilim layla deyir, gözüm ağlayır.
Təbim haqsızlığın tutub yasını,
Qələmim, varağım, sözüm ağlayır.

Xəyalım yol gedir qəm karvanında,
Dururam hər doğma məzar yanında,
Müqəddəs şəhidlər xiyabanında,
Varlığım titrəyir, üzüm ağlayır.

Baxıram hönkürən qərənfillərə,
Nərgizə, Laləyə, incə güllərə,
Bu vaxtsız saralan qönçə güllərə,
Aranım, yaylağım,düzüm ağlayır.

Əzizə, dərdlərin qatar durnadı,
Elə havalanır, burma - burmadı.
Məni danışmaga şeirim qoymadı,
Yandım korun - korun, közüm ağlayır.