Böyük Britaniyada Kral III Çarlzın qardaşı şahzadə Endryu bütün titullarından və fəxri adlarından məhrum edilib.

"Turaztv.az" “Qafqazinfo” -ya istinadən xəbər verir ki, Bukingem Sarayı iki gün əvvəl kralın bu qərarı rəsmi şəkildə təsdiqlədiyini açıqlayıb.

Qərar Virciniya Cuffrenin ölümündən sonra nəşr olunan xatirələrdə Endryu haqqında yeni pedofiliya ittihamlarının ortaya çıxmasından sonra verilib.

Məlumata görə, Endryu bu açıqlamalarla bağlı Ceffri Epşteyn işi çərçivəsində ifadə verməyə çağırıla bilər.

Kralın kiçik qardaşı artıq “York Hersoqu”, “İnverness Qrafı” və “Baron Killyleagh” titullarını, həmçinin, bütün orden və simvolik rütbələrini itirib. Bununla da o, monarxiya ilə bütün rəsmi əlaqələrindən uzaqlaşdırılıb.

Britaniya mediasının məlumatına görə, Endryu yaxın aylarda Kral Lojasından köçməlidir. Tac mülkiyyətinə məxsus bu malikanədə o, 2003-cü ildən bəri yaşayırdı. Endryu həmin vaxt 7,5 milyon funt sterlinq depozit ödəyərək 2078-ci ilə qədər qalmaq hüququ əldə etmişdi.

Lakin qərardan sonra o, Sandringem malikanəsinə köçürüləcək. Ailə üzvləri onunla birlikdə görünmək istəmədiyi üçün köçürülmə ilin sonuna qədər təxirə salınıb.

Sandringem sakinləri keçmiş şahzadənin əraziyə köçməsindən narazılıq ifadə ediblər.

“Biz o adamı qonşuluğumuzda istəmirik”, - “The Sun” qəzetinə danışan bir sakin deyib.

Kral ailəsi üzrə ekspert Cenni Bond bildirib ki, Endryu Sandringemdə ictimaiyyətdən uzaq, “zahid həyatı” sürəcək:

“O, mümkün olan ən aşağı profildə qalmağa çalışacaq”.

“The Guardian” yazır ki, Kral Çarlz qardaşına təxminən 558 min funt sterlinq kompensasiya ödəyəcək. Bu məbləğ Kral Lojasının icarə müqaviləsindəki “çıxarılma şərti”nə əsaslanır.

Endryunun digər gəliri Kral Donanmasından aldığı illik 20 min funt sterlinq təqaüddür.

O, hələ də taxt-taca varislik xəttində səkkizinci yerdə qalır. Onun bu siyahıdan çıxarılması üçün konstitusiya dəyişikliyi və Parlamentin təsdiqi tələb olunur.

Endryu Virciniya Cuffrenin xatirələrindəki yeni ittihamlar səbəbindən yenidən hüquqi araşdırma ilə üzləşə bilər.

Cuffre kitabında şahzadənin onu 17 yaşında olarkən cinsi istismara məruz qoyduğunu iddia edir. Eyni zamanda, Endryu ilə Ceffri Epşteynin əlaqələrinin Epşteynin cinayətləri ifşa edildikdən sonra da davam etdiyini göstərən e-poçtlar üzə çıxıb.