ABŞ Prezidenti Dohaya hücumdan dərhal sonra İsrailin Baş naziri və Qətər əmiri ilə danışıb. AZƏRTAC-ın məlumatına görə, bu barədə Ağ Evin sözçüsü Kerolayn Livit açıqlayıb. O, bildirib ki, bu səhər Birləşmiş Ştatlar ordusu Tramp administrasiyasını İsrailin HƏMAS-ın Dohada yerləşən bölməsinə hücum etdiyinə dair xəbərdar edib.

“Suveren bir xalq və ABŞ-ın yaxın müttəfiqi olan, sülhə nail olmaq üçün bizimlə birlikdə ciddi çalışan və riskə girən Qətəri bombalamaq nə İsrailin, nə də Amerikanın məqsədlərinə uyğun ola bilməz. Bununla belə, Qəzzada yaşayanların səfalətindən qazanc əldə edən HƏMAS-ın məhv edilməsi ali məqsəddir. Prezident Tramp dərhal xüsusi elçi Stiv Uitkofa yaxınlaşan hücum haqqında qətərliləri məlumatlandırmağı tapşırıb. Prezident Qətərə ABŞ-ın güclü müttəfiqi və dostu kimi baxır və bu hücumla bağlı təəssüf hissi keçirir”, - deyə mətbuat katibi əlavə edib. Onun sözləronə görə, Prezident Tramp Qəzzada bütün girovların azad edilməsi, ölənlərin cəsədlərinin götürülməsi və bu müharibənin tezliklə bitməsini istəyir. Qeyd olunur ki, Tramp bundan sonra Baş nazir Netanyahu ilə də danışıb və o, tez bir zamanda sülhün bərqərar olmasını istədiyinu bildirib.