NATO missiyası çərçivəsində Litvada yerləşdirilmiş fransız “Rafale” döyüş təyyarələri uçuş planı olmadan Baltik hava məkanına daxil olan iki Rusiya “Su-24” təyyarəsinin qarşısını alıblar. Bu, gərginliyin yüksək olduğu bölgədə həyata keçirilən növbəti əməliyyatdır.

Turaztv.az AZƏRTAC-a istinadən xəbər verir ki, təyyarələrin Litva hava məkanına heç bir uçuş planı təqdim edilmədən daxil olduğu bildirilir. Fransız Hərbi Hava və Kosmik Qüvvələrinə məxsus “Rafale” qırıcıları bu təyyarələri müşayiət edərək bölgədən uzaqlaşdırıb. Əməliyyatın görüntüləri sosial şəbəkələrdə yayımlanıb.

Fransız təyyarələri hazırda Baltik ölkələrinin hava məkanında NATO-nun “Baltic Air Policing” missiyası çərçivəsində xidmət edir. Missiyanın məqsədi regionda hərbi hava resursları məhdud olan ölkələri mümkün təhdidlərdən qorumaqdır. 2026-cı ilin martından etibarən Rumıniya və Fransa hava qüvvələri bu missiyanı icra edir. Bundan əvvəl isə İspaniya və İtaliya qüvvələri bölgədə xidmət göstərib.

Baltik regionunda təhlükəsizlik vəziyyəti hələ də mürəkkəb olaraq qalır. Son dövrlərdə müxtəlif pilotsuz uçuş aparatlarının Baltik ölkələri və Finlandiya üzərində insidentlərə səbəb olduğu bildirilir.

Litva Milli Müdafiə Nazirliyi nazirinin müavini Vitalija Zumeriene qeyd edib ki, bu cür hadisələr regionda hava hücumundan müdafiə sistemlərinin gücləndirilməsinin vacibliyini göstərir.

Qeyd edək ki, fransız “Rafale” qırıcılarının qarşısını aldığı Rusiya təyyarələrindən biri Qvardiyanın 4-cü Hərbi Dəniz Aviasiya alayına məxsus “RF-34002” qeydiyyat nömrəli bombardmançı olub.